Battur's Weblog

Power Session with Screen No.2

2010-12-28T00:19:00.016+08:00

Терминалийн олон цонхтой ажилладаг хүнд бол screen хамгийн догь таарах байх. Цонхноос цонхонд шилжих, copy+paste хийх, текст хайх зэрэг нь үнэхээр гарын дор. Өөрийн ашигладаг аргачлалаа хуваалцъя.

Screen цонхон дотор таабууд нээх боломжтой. Өнгө будаг, харагдац мэтээр нэмэлт тохиргоог бүрэн хийдэг. Үүнийг .screenrc файлд байршуулна. .vimrc файлаар Vim-ийн анхдагч араншинг тодорхойлдог шиг.

screen дотор хэд хэдэн тааб нээхэд нэр нь 0 bash | 1 bash | 2 bash мэтээр харагдах вий. Аль таабад нь юу байгаа нь мэдэгдэхгүй жаахан төвөгтэй. Ctrl + a; Shift + a коммандаар таабын нэрийг солих боломжтой. Энэ мэтээр дараахь 3 цонхыг нэрлэсэн байна гэж саная:

0 log | 1 emacs | 2 test/spec

Ctrl + a; 2 түлхүүрээр test/spec цонх руу, Ctrl + a; 0 -оор лог урсаж байгаа цонх руу үсрэх нь. Таабыг дараалан шилжиж байж сая зорьсон газраа ирдэгийн дэргэд бол том дэвшил.

Програм бичих бүрт screen тааб нээх, нэрлэх комманд цохихоос жаахан төвөгшөөж байгаа бол нь доорхи жижиг скриптийг .profile, эсхүл .bashrc файлдаа хуулаарай. Хэрэглэгч логин хийх бүрт $HOME/.railsdev файлыг үүсгэх боловч, shell-тэй холбоотой бүх тохиргоо нэг дор байх юм, өөрөөр хэлбэл засварыг нэг л файлд хийнэ гэсэн үг. За тэгээд төстэй байдлаар янзан бүрийн workspace үүсгэж болно. Доорхи жишээний хувьд терминаль дээр railsdev гэсэн комманд цохиход миний өмнө 0 server | 1 shell | 2 coding | 3 irb | 4 dbconsole гэсэн тааб бүхий screen програм нээгдэх нь.

Зураг 1. 5 тааб бүхий workspace үүссэн байдал

Файлын агуулга:

===== $HOME/.bashrc =====

cat <<END > $HOME/.railsdev
source $HOME/.screenrc

screen -t server
screen -t shell
screen -t coding
screen -t irb
screen -t dbconsole
END

function railsdev {
screen -S railsdev -c $HOME/.railsdev
}

==== $HOME/.screenrc ====

defencoding utf8
hardstatus on
hardstatus alwayslastline
hardstatus string "%{= wk} %-w%{=b dk} %n %t %{-}%+w %= [%H] %m/%d %c%{-}"
bind s colon "screen ssh"
defscrollback 1024

attrcolor b ".I"
termcapinfo xterm 'Co#256:AB=\E[48;5;%dm:AF=\E[38;5;%dm'
defbce "on"
term xterm-256color

Эрхэмээгийн бичсэн "Power Session with Screen" постыг заавал уншаарай. Сисадминууд, connection over ssh ашигладаг хүмүүст ихээ хэрэгтэй эд. Удалгүй хэн нэгэн нь Power Session with Screen No.3-г бичих байх аа гэж найдаж байна.

Уг постыг бичих санаа Google Buzz дээр өрнөсөн энэ хэлэлцүүлгээс үүдэлтэй болно. Нэг харчихаарай, хэрэгтэй зүйл нэмэгдсэн байх вий.

Update: Доорхи .screenrc файлаар screen маань cygwin дээр асуудалгүй ажиллах нь.

$ cat .screenrc
# Change scrollback to 10000 lines
defscrollback 10000

# status line at the bottom
hardstatus on
hardstatus alwayslastline
hardstatus string "screen %n (%t)%? [%h]%?"
caption always '%{yb} %H %{k}|%L=%= %{w}%?%-Lw%45L>%?%{=b bR}[%{W}%n%f %t%?(%u)%?%{=b bR}]%{= bw}%?%+Lw%?%?%=%-30= %{k}|%{Y}%l%{k}|%{=b C} %m/%d %c %{W}'

Лазик хийлгэхээр хамтдаа явах хүн хайж байна

2010-05-04T20:19:00.001+08:00

Хараа муутай байх хэцүү. Сурагч, оюутан ахуй үест сурлагад их нөлөөлдөг. Самбар дээрхийг хардаггүй хүн чинь ер нь л хичээлээс хоцрох талдаа. Ажил дээр гарсан хойно өөдөөс ирж яваа таньдаг хүнээ харахгүй өнгөрөөгөөд явуулчихна. Танил гайхаад л хоцорно.

Яг ийм бэрхшээлтэй хүмсийн нэг бол би. Энэ сарын сүүлээр лазик хийлгэхээр төлөвлөж байна. Үүргэвч үүрээд, хамт Энэтхэг явах хүн хайж байна. Ханиндаа явбал нь зэгсэн амар байх болов уу, бүр дөрвүүл тавуулаа явсан ч болох. Хэрэв та санаа нэгдэж байвал, эсхүл таних мэдэх тийм хүн байвал нь надтай холбогдоно уу. Цугаараа хямд зардлаар, эрүүл хараатай болоод ирье. Надтай batturjapan dot gmail dot com, эсхүл 8801-9892 утсаар холбогдож болно.

Очих эмнэлэг, хагалгааны үнэ хөлс, гарах зардлын талаар ойрын үед тодруулна. Тодорхой болохоор нь дахиад нэг пост болгоод оруулъя.

Тийм нэгэн дурсамж...

2010-03-17T22:42:00.006+08:00

Цас мөсөн дээр гулгах сайхан. Салхи татуулаад л, цас манаргаад л, огцом шарваад л, харайгаад л... Дунд сургуулийн 2, 3 жилийг лав донтой юм шиг гулгаж өнгөрүүлсэн санаж байна. Гэр хороололд өссөн нэг үеийнхэн маань тэр аяаараа л цана чаргатай нөхөрлөсөн хүүхдүүд байдагсан. Хашаанаас гарч, хэд алхаад л гулгах талбай бэлэн байдаг байсан болохоор аргагүй ч биз дэ.

Манай урд дэнж дээр хүүхдүүд их гулгана. Машин яваад, цас нь дагтаршчихна. Огцом урууг хэлэх үү,гулгана гэдэг 300 км/ц хурдлах дайны юм болно. Талбай нарийхан, зам нь гөлгөр болохоор цанаар бус трубагаар гулгана. Бадриун төмрөөр тахийлган урласан нэг тийм унаа бараг хүүхэд бүрт нэжгээд байдагсан. Хоорондоо уралдана, шахалдана, харайна. Ар араасаа ухасгээд л зэрвэс харвал 10, 20-иод тэрэгтэй тээврийн цуваа шиг тахиралдаж мурилдаад л, дуу шуугаа авалцаад л сүйд гулгана. Урд нь ойчсон нэгнээ замын бөглөө гэж бусад нь гоочилход, битгий гуц! гэж өөдөөс нь мөчөөрхөнө. Тэгснээ пархийтэл инээлдэнэ. Том жижиггүй л өнөөх трубагаа үүрээд, бөөндөө дээшээ алхдагсан.

10 минут мацаад, 10 хан секунд гулгахыг юман чинээ тоодоггүй, даргивал даргичихдаг, тогловол тоглочихдог, тийм л хүүхдүүд байж дэ, бид.

Манлайллын хичээл буюу Бүжих залуу

2010-02-26T14:55:00.022+08:00

Derek Sivers[1]-ийн "Leadership Lessons from Dancing Guy" нийтлэлийг орчуулан хүргэж байна. Энэ сэдэв болон орчуулгын талаарх санал шүүмжийг дуртайяа хүлээн авна.

(ШИНЭЧИЛСЭН: Өчигдөр TED Conference[2] дээр хийсэн 3 минутын энэ яриа маань нижигнэсэн алга ташилтаар мялаалга авсан!)

Транскрипт:
Хэрэв манлайлах, өөрчлөлт хийх талаар та олон зүйл мэддэг бол дээрх 3 минутын видеог эхнээс нь дуустал нэг үзээрэй.

Эхлээд балай харагдаж болох ч манлайлагч хүн ганцаар сөрөөд зогсох зүрх зоригтой байх хэрэгтэй. Түүний хийж байгаа үйлдэл их энгийн, хэдхэн л хөдөлгөөн байна. Энэ бол түлхүүр. Чамайг дагахад амархан байх ёстой!

Эхний дагагч ирлээ(маш чухал рольтой): энэ хүн бусдад хэрхэн дагахыг харуулж байна. Анзаарвал нь манлайлагч(бусдын бодлоор: балай хог) түүнийг өөртэйгээ тэнцүү хэмжээнд хүлээн авлаа, ингэснээр "хачин үйлдэл" зөвхөн манлайлагчийнх бус, тэдний үйл хэрэг боллоо, одоо тэд хоёул манлайлагч. 2 дахь залуу найз нараа нэгдэхийг уриалж байна. Анхны дагагч болоход мөн л зүрх зориг хэрэгтэй нь тодорхой байна! Чи дарамт сонжуурыг үл хайхран сөрөн зогсоно. Харамсалтай нь элдэв яриа, дүгнэлтүүд эхний дагагчийн үнэ цэнийг орхигдуулах нь олонтаа. Угтаа бол энэ хүн л солгой[3] зоригтонг жинхэнэ манлайлагч болгон хувиргадаг. Хэрвээ эхний хүнийг чулуу гэвэл хоёр дахь хүн галыг ноцоох оч нь болой.

2 дахь дагагч бол жинхэнэ эргэлтийн цэг: эхний дагагч амжилттай болсныг батлах нотолгоо. Одоо нэг солгойн хэрэг биш, бүр хоёроор тогтохгүй солгойн хэрэг боллоо. Гурван хүн бол бөөн бүлэг, бөөн бүлэг бол жинхэнэ сенсаци.

Өөрчлөлт нийтэд ил байх ёстой. Хөндлөнгийн үзэгчид зөвхөн манлайлагчийг бус өөр бусдыг ч харж байх нь чухал. Бүгд л хэн нэгдсэнийг сонирхоно, учир нь манлайлагч бус дагагчид л дагагчийг соронзоддог.

2 хүн нэмээд ирлээ, дараа нь 3, 4. Инерциэ жинхэнэ авч эхэлж байна да... Энэ бол шилжилтийн цэг. Өндрөө авлөө.

Хүн нэмэгдэх тусам, айдас улам багасна. Хэрэв хэдэн залуус хашаа тэгнээд сууж байсан бол, одоо тэдэнд нэгдэхгүй байх шалтгаан үгүй боллоо. Нэгдэхэд ондгой сондгой зүйл алга, түмний шившиг болно гэж айхын ч хэрэг алга. Хэдхэн минутын дараагаар бүх хүн бөөн бүлэгт орохыг хүснэ, учир нь нэгдэхгүй бол балай.

Ноёд, хатагтай нар аа! Өөрчлөлт хэрхэн явагддагийг бид үзлээ. Эндээс ойлгосон зүйлээ нэгтгээд нэг дүгнэе:

Хэрвээ та ганцаараа бүжиглэж байсан нүцгэн залуугийн нэг бол, эхэлж дагах цөөн хэдэн хүнд өөртэйгөө ижил тэнцүү ач холбогдол өг. Өөрийгөө дөвийлгөх биш, үйл явдлыг ил тод байлгахад анхаарал тавь.

Нээлттэй бай! Даган дуурайхад хялбар бай!

Гэхдээ эндээс нэг зүйлийг анзаарсан уу?

Манлайлал гэдгийг бид зөвхөн нэг хүний үйл хэрэг мэтээр тусгаж авдаг.

Хэдийгээр нүцгэн залуу энэ бүгдийг эхлүүлсэн, бүх гавъяа түүнд очиж байгаа ч, ягтаа юу болдгийг бид харлаа.

Солгой зоригтонг жинхэнэ манлайлагч болгодог эргэлтийн хүч бол эхний дагагч юм.

Эхний дагагчгүйгээр ямар ч өөрчлөлт, шинэчлэлт оршин байхгүй.

Манлайлагч нь байх хэрэгтэй гэдэг үгсийг бид хангалттай сонсож ирсэн, бүр улиг болтол ярьдаг, бодит байдал тэс өмнөө гэдгийг бид харлаа.

Ач холбогдол өгдөг зүйлдээ өөрчлөлт хийх жинхэнэ алхам бол зориг зүрхтэйгээр дагаж, бусдад хэрхэн нэгдэхийг харуулах явдал юм.

Хэрвээ хэн нэгэн солгой ямар нэгэн гайхалтай зүйлтэй ноцолдож байгаа бол нь сэтгэл, зориг зүрх гаргаад, хамтдаа хий, хамтдаа урагшил.

========================================
Тайлбар:
Эх нийтлэлд доорхи тайлбар багтаагүй бөгөөд уншигчдад ойлгомжтой байлгах үүднээс бичигдсэн болно. Эхийг эндээс унших боломжтой.

[1] Derek Sivers нь CD Baby-ийн үүсгэн байгуулагч гэдгээр олонд танигдсан. 1987 оноос мэргэжлийн хөгжимчин(мөн циркт алиалагч)-өөр ажиллаж байсан тэрээр өөрийн CD-г вебээрээ дамжуулан зарж байгаад, 1998 онд CD Baby-г үүсгэн байгуулсан, тун удалгүй найз нөхөд нь ч мөн CD-ээ заруулах болсон байна.

CD Baby нь 150,000 хөгжимчний бүтээлийг дэлгэж, 100 сая америк долларын борлуулалт хийснээрээ тухайн цаг үеийн хамгийн том хөгжмийн(бие даасан) бүтээл худалдаалагчид тооцогдож байлаа. 2003 онд World Technology Award шагнал авсных нь дараагаар Esquire сэтгүүл түүнийг оны "Best&Brightest" хүнээр нэрлэхийн сацуу, "Derek Sivers бол хөгжим худалдан авах, худалдаалах арга барилд хувьсгал хийж буй урлаг-бизнесийн гялалзсан од" хэмээн бичиж байв.

2008 онд тэрээр CD Baby компаниа зарж, хөгжимчид, урлагийнханд чиглэсэн шинэ бизнес эхлүүлсэн. Өдгөө тэрээр итгэлт нөхдийн хамтаар "MuckWork" компанийг удирдан авч явна. Түүний ажил, сүүлийн үеийн сонин сайхны талаар sivers.org сайтаас дуулах боломжтой.

[2] TED (Technology, Entertainment, Design) нь эрхлэн явуулдаг хурал цуглаанаараа олон танигдсан АНУ-н ашгийн бус байгууллага(хувийн) ба "түгээх учиртай санаа(ideas worth spreading)" урианд түшиглэн өдгөө Европ, Ази тив, мөн АНУ-д үйл ажиллагаа явуулж байна. Цуврал лекц буюу TED Talks нь интернэтэд өргөнөөр түгээгддэг ба лекторын хэн байхаас үл хамааран 18 минутын урттай байдаг. Эх сурвалж: Википедиа.

[3] Содон, хачин гэдэг утгаар хүлээн авахыг хүсч байна.

"Marketing" in a few words...

2010-02-24T09:44:00.004+08:00

Зүгээр л хөгжилтэй санагдлаа:

You’re at a party and see a beautiful woman. You walk up to her and say, “I’m great in bed.” That’s Direct Marketing.

You’re at a party and see a beautiful woman. You ask your friend to walk up to her and say, “See that guy over there? He’s great in bed.” That’s Advertising.

You’re at a party and see a beautiful woman. You get her phone number from someone. The next day you call and say, “I’m great in bed.” That’s Telemarketing.

You’re at a party and see a beautiful woman. You comb your hair, straighten your tie, then ask if she’d like drink. You chat and joke with her throughout the evening, offer her a ride home, walk her to her door, then say, “By the way, I’m great in bed.” That’s Public Relations.

You’re at a party and see a beautiful woman. She walks up to you and says, “I know you. You’re the one who’s great in bed.” That’s Brand Recognition.

Эх сурвалж: Direct Creative Blog

Зургийн файлыг PDF рүү хөрвүүлэн нэгтгэх нь

2010-02-21T19:55:00.009+08:00

Төслийн эхлэл болоод төгсгөл шатанд хэн хүнгүй бичиг баримттай зууралдах хэрэгцээ нэлээдгүй гардаг. Шивээд нэг файлд эмхэтгэдэг word, excel мэтийн баримтууд бол яах вэ, асуудал алга. Аа харин тодорхой дэс дараа бүхий сканнердсан цаас, эсхүл зураг хөрөг мэт нь багагүй арчилгаа шаарддаг. Жаахан хайнга хандсан үед хөл толгой нь үл мэдэх зунгаарсан садаа болж хувирах нь ч бий.

Жишээлбэл надад тамгалаад, батлачихсан гэрээ(8 хуудас) байлаа гэж саная. Хуудас хуудсаар нь сканнердаад, 8 ширхэг зураг болгочихно. Дараа нь энэ бүгдээ Trac, Redmine зэрэг хамтын ажиллагаа, төслийн удирдлагын талбарт хуулна. 8 удаа browse товч дарахад хамаа алга гэхэд түүнийг үзэх, ашиглах хүнд баахан төвөгтэй. Болдог бол бүгдийг нь базаад нэг PDF файл болгочихмоор. Хуулахад ч, үзэхэд ч, маллахад ч амар. Тэгвэл яаж үүнийг хийх вэ?

Танд imagemagick[1] тус болно. За ингээд, алхам алхмаар хамтдаа хийж үзье. Танд дараахь зургийн файлууд байгаа гэж саная:

$ ls -lh
total 19M
-rwxr-xr-x 1 battur battur 2.7M 2010-02-21 19:24 DSC_0801.JPG
-rwxr-xr-x 1 battur battur 2.6M 2010-02-21 19:24 DSC_0802.JPG
-rwxr-xr-x 1 battur battur 2.6M 2010-02-21 19:24 DSC_0803.JPG
-rwxr-xr-x 1 battur battur 2.0M 2010-02-21 19:24 DSC_0804.JPG
-rwxr-xr-x 1 battur battur 2.0M 2010-02-21 19:24 DSC_0805.JPG
-rwxr-xr-x 1 battur battur 2.4M 2010-02-21 19:24 DSC_0806.JPG
-rwxr-xr-x 1 battur battur 2.2M 2010-02-21 19:24 DSC_0807.JPG
-rwxr-xr-x 1 battur battur 2.2M 2010-02-21 19:24 DSC_0808.JPG

Ер нь бол нэг нь л дор хаяад 3 мега байт(3008x2000) хүртэл хэмжээтэй гэвэл эднийг тэр чигт нь PDF болговол веб рүү хуулж барахгүй нүсэр том хэмжээтэй болох байх. Ийм учраас юуны түрүүнд бүх зургаа 1200 пикселийн өргөнтэй болгож хэмжээг нь багасгая(өндөр нь дагаад багасна):

$ mogrify -resize 1200 *.JPG
$ ls -lh
total 1.3M
-rw-r--r-- 1 battur battur 198K 2010-02-21 19:25 DSC_0801.JPG
-rw-r--r-- 1 battur battur 199K 2010-02-21 19:25 DSC_0802.JPG
-rw-r--r-- 1 battur battur 188K 2010-02-21 19:25 DSC_0803.JPG
-rw-r--r-- 1 battur battur 126K 2010-02-21 19:25 DSC_0804.JPG
-rw-r--r-- 1 battur battur 127K 2010-02-21 19:25 DSC_0805.JPG
-rw-r--r-- 1 battur battur 166K 2010-02-21 19:25 DSC_0806.JPG
-rw-r--r-- 1 battur battur 144K 2010-02-21 19:25 DSC_0807.JPG
-rw-r--r-- 1 battur battur 142K 2010-02-21 19:25 DSC_0808.JPG

Үүний дараагаар багассан зургуудаа нэг PDF файлд нэгтгэе:

$ convert *.JPG 201002_Geree_XYZCompany.pdf
Segmentation fault

Уул нь дээрх тушаал байхад л хангалттай боловч миний машин алдаа өгөөд явсангүй. Нэг дор олон файл хөрвүүлж дийлэхгүйгээс бус ганц ганцаар нь бол чадаад байна.

$ ls | grep JPG | while read name; do \
convert $name ${name/JPG}PDF; done; ls -lh
total 2.6M
-rw-r--r-- 1 battur battur 198K 2010-02-21 19:25 DSC_0801.JPG
-rw-r--r-- 1 battur battur 202K 2010-02-21 19:27 DSC_0801.PDF
-rw-r--r-- 1 battur battur 199K 2010-02-21 19:25 DSC_0802.JPG
-rw-r--r-- 1 battur battur 204K 2010-02-21 19:27 DSC_0802.PDF
-rw-r--r-- 1 battur battur 188K 2010-02-21 19:25 DSC_0803.JPG
-rw-r--r-- 1 battur battur 193K 2010-02-21 19:27 DSC_0803.PDF
-rw-r--r-- 1 battur battur 126K 2010-02-21 19:25 DSC_0804.JPG
-rw-r--r-- 1 battur battur 130K 2010-02-21 19:27 DSC_0804.PDF
-rw-r--r-- 1 battur battur 127K 2010-02-21 19:25 DSC_0805.JPG
-rw-r--r-- 1 battur battur 130K 2010-02-21 19:27 DSC_0805.PDF
-rw-r--r-- 1 battur battur 166K 2010-02-21 19:25 DSC_0806.JPG
-rw-r--r-- 1 battur battur 170K 2010-02-21 19:27 DSC_0806.PDF
-rw-r--r-- 1 battur battur 144K 2010-02-21 19:25 DSC_0807.JPG
-rw-r--r-- 1 battur battur 148K 2010-02-21 19:27 DSC_0807.PDF
-rw-r--r-- 1 battur battur 142K 2010-02-21 19:25 DSC_0808.JPG
-rw-r--r-- 1 battur battur 146K 2010-02-21 19:27 DSC_0808.PDF

Тэгвэл олон PDF файлыг нэгтгэчихдэг програм бий болов уу? Хайлаа... Байна! GhostScript[2] :) Нэгтгэе:

$gs -dNOPAUSE -sDEVICE=pdfwrite -sOUTPUTFILE=201002_Geree_XYZCompany.pdf -dBATCH *.PDF && ls -lh
GPL Ghostscript 8.70 (2009-07-31)
Copyright (C) 2009 Artifex Software, Inc. All rights reserved.
This software comes with NO WARRANTY: see the file PUBLIC for details.
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
Processing pages 1 through 1.
Page 1
total 2.9M
-rw-r--r-- 1 battur battur 289K 2010-02-21 19:28 201002_Geree_XYZCompany.pdf
-rw-r--r-- 1 battur battur 198K 2010-02-21 19:25 DSC_0801.JPG
-rw-r--r-- 1 battur battur 202K 2010-02-21 19:27 DSC_0801.PDF
-rw-r--r-- 1 battur battur 199K 2010-02-21 19:25 DSC_0802.JPG
-rw-r--r-- 1 battur battur 204K 2010-02-21 19:27 DSC_0802.PDF
-rw-r--r-- 1 battur battur 188K 2010-02-21 19:25 DSC_0803.JPG
-rw-r--r-- 1 battur battur 193K 2010-02-21 19:27 DSC_0803.PDF
-rw-r--r-- 1 battur battur 126K 2010-02-21 19:25 DSC_0804.JPG
-rw-r--r-- 1 battur battur 130K 2010-02-21 19:27 DSC_0804.PDF
-rw-r--r-- 1 battur battur 127K 2010-02-21 19:25 DSC_0805.JPG
-rw-r--r-- 1 battur battur 130K 2010-02-21 19:27 DSC_0805.PDF
-rw-r--r-- 1 battur battur 166K 2010-02-21 19:25 DSC_0806.JPG
-rw-r--r-- 1 battur battur 170K 2010-02-21 19:27 DSC_0806.PDF
-rw-r--r-- 1 battur battur 144K 2010-02-21 19:25 DSC_0807.JPG
-rw-r--r-- 1 battur battur 148K 2010-02-21 19:27 DSC_0807.PDF
-rw-r--r-- 1 battur battur 142K 2010-02-21 19:25 DSC_0808.JPG
-rw-r--r-- 1 battur battur 146K 2010-02-21 19:27 DSC_0808.PDF

Ингээд л боллоо до. Одоо ч хуулаад, хуваалцаад байна бид дэ хө ;)
Хэрэггүй гэж үзвэл зургаа мөн ганц хуудастай PDF файлуудаа устгана биз ээ.

Дүгнэлт:

Линукст хар мянган гоё програм бий.
Линуксчид "дугуй"-г дахин нээж цагаа үрдэггүй.
Линукс бол бүтээмжит хүний хөлөглөх унаа.

Тайлбар:

[1] ImageMagick^® is a software suite to create, edit, and compose bitmap images. It can read, convert and write images in a variety of formats (over 100) including DPX, EXR, GIF, JPEG, JPEG-2000, PDF, PhotoCD, PNG, Postscript, SVG, and TIFF. Use ImageMagick to translate, flip, mirror, rotate, scale, shear and transform images, adjust image colors, apply various special effects, or draw text, lines, polygons, ellipses and Bézier curves.

The functionality of ImageMagick is typically utilized from the command line or you can use the features from programs written in your favorite programming language. Choose from these interfaces: G2F (Ada), MagickCore (C), MagickWand (C), ChMagick (Ch), ImageMagickObject (COM+), Magick++ (C++), JMagick (Java), L-Magick (Lisp), NMagick (Neko/haXe), MagickNet (.NET), PascalMagick (Pascal), PerlMagick (Perl), MagickWand for PHP (PHP), IMagick (PHP), PythonMagick (Python), RMagick (Ruby), or TclMagick (Tcl/TK). With a language interface, use ImageMagick to modify or create images dynamically and automagically.

ImageMagick is free software delivered as a ready-to-run binary distribution or as source code that you may freely use, copy, modify, and distribute. Its license is compatible with the GPL. It runs on all major operating systems. Эх сурвалж: http://www.imagemagick.org/

[2] Ghostscript is a suite of software based on an interpreter for Adobe Systems' PostScript and Portable Document Format (PDF) page description languages. Эх сурвалж: Википедиа.

Let's save talented young darts player

2010-02-13T02:23:00.003+08:00

From http://savebat.blogspot.com/

Dear all,

After suffering 2 years without diagnosis, our invaluable friend, great son, gentle brother, talented darts player ERDENEBAT "BACHO" Boldbaatar, was diagnosed with disseminated tuberculosis, uremia and renal failure in early 2010.

Bacho was born in July 6^th, 1984, Ulaanbaatar, Mongolia. His father, Boldbaatar, was an intelligent, polite, and noble person with a unique purpose to originate the first Mongolian Darts Association in Mongolia. Unfortunately, in 1998 by God’s will, he left his family, his friends, and the First Mongolian Darts Association formed by him.

In 2008, Bacho had a small surgery to his right hand, but unlikely the blood got infected. Subsequently, the infection hit the backbone and Bacho barely could walk. From 2008 to 2009, Mongolian doctors were in charge of the procedure, but the health was getting worse and worse. Family decided to take him to China and Korea to diagnose. Unfortunately, it was just a waste of money and time. Nobody knew what is wrong with him.

Early in the morning of January 22^nd, 2010, Bacho’s mother and brother received horrible, terrifying and unbelievable news from the doctors, Bacho has only 7 days to live. At that time, Bacho was paralyzed and could not even talk. Fortunately, after few days “Bumrungrad International” hospital in Thailand decided to take the responsibility. (It was the last chance and hope). They warned that this is a big risk to take a plane, and even he makes to Thailand he has only 3% of survival chance. Bacho was placed directly to the Intensive Care Unit which costs $5000 daily. After few days, doctors confirmed that Bacho’s survival chances increased ten times becoming 30% (Heart started stabilizing; kidney started operating). Doctors are shocked how Bacho is fighting for life. But we know, he is fighting for his purpose, he is fighting for his family, he is fighting for his friends, and he is fighting for the bright future that he deserves….

Doctors require him to stay at the Intensive Care Unit for least 2-3 more weeks, which costs $70,000 (this fee needs to be paid up-front). If after 2 weeks doctors decide to move him to a normal room, it will cost $500 per day (and treatment will continue for 9 months), which makes it to stand at around $90,000. The total approximate cost: $160,000.

His family already sold their apartment; his sole brother sold his car. Nothing left anymore in the family, but hope. Today, we, Bacho’s friends, decided to help him and his family. Please, join us to save the great young man who should continue his journey of life with his family and friends. Please help us to spread this information all over the world.

Thank You for your attention and help…

Please, join us to save the young man's life...

Цэвэр агаараа санагалзахуй

2010-01-17T01:56:00.001+08:00

Зун болоосой[1]. Цэвэр агаараар цээж дүүрэн амьсгалахсан. Утаа униарыг умартаад, уулын орой дээр гарсан шиг, холын барааг ажиглан суухгүй юу. Айраг цагаа нь гарчихсан, хүн олны[2] зоо нь тэнийсэн, ажил үйлс нь өрнөсөн тийм л цаг үеийг хүсэмжилнэ. Урин дулаан цагт дарсан зурагнаасаа жаалыг янзлаад блогтоо тавьж байна. Хэдэн хором цэвэр агаарт гарах уу, хө! Зураг дээр дарж, томруулан хараарай ;)

Хөдөө сайхаан...

Хаврын улирал ч бас сайхан.

Эцэг хөх тэнгэр, эх ногоон дэлхийгээ хайрлаж явъя аа, найзууд аа!

Тэрэлж. Гөө мөн таатай мэдрэмж ээ?

Хайрын яргуй
Хаврын яргуй

Жич: Дээрх фото зургуудыг арилжааны зориулалтаар ашиглахыг хориглоно. Аа харин[3] угаалгаад ханандаа хадах, оюутны наадамд үзүүлэн болгож тавих зэрэгт чөлөөтэй ашиглаж болно. Веб, блогт байршуулах тохиолд энэ постыг холбож өгөөрэй. Зурагнуудыг тамгалсангүй :)

Тайлбар:

[1] Цэвэр агаараар зөвхөн зун л амьсгалдаг юм биш шүү дэ !?

[2] Хот бараадсан маниуд л, өвөлдөө хөгөө нэг чирэх юм. Гэхдээ энэ нэг их удаан үргэлжилэхгүй л байлгүй дэ. Улс орон хөгжинө, ард түмэн нь бэлжинэ, амьдрал ахуй нь дээшилнэ. Ирээдүйг өөдрөгөөр төсөөлж байна.

[3] Хүнд үзүүлэхээр олигтой зураг авчихсан биш гээд, архагууд намайг баахан зэмлэх вий дэ :)

Убунту 9.10, японоор бичих нь

2010-01-13T23:30:00.008+08:00

Гэрийн компьютерт Убунту 9.10 буюу Кармик Коалаг суулган ашиглаж байна. 8.10 хувилбараас юм юмаараа хамаагүй дээрдсэн бололтой. Харин өнөөдөр японоор бичих хэрэгцээ гараад, Anthy-г тохируулах гэж баахан мунгинав. Уул нь ч амархан байсан юм билээ.

Хуучин өргөнөөр хэрэглэгдэж байсан SCIM-ийн хөгжүүлэлт зогсож байгаа тул 9.10-аас IBUS IME[1]-г оронд нь ашиглах нь. SCIM нь өргөтгөх боломж, уян хатан байдлын хувьд нэлээдгүй гологдож(тухайлбал: асахад ганц удаа тохиргоог санах), илүү дөмөг(динамик ажиллагаа) системд ийн халаагаа өгч байна.

Ингээд япон гар, оролтыг хэрхэн тохируулахыг товч тайлбарлъя:

System => Administration => Language Support
Keyboard input method system гэдэгт ibus-ийг тохируулна.
Мөн Install/Remove languages-с япон хэлийг сонгон суулгана.
System => Preferences => IBus Preferences => Input Method
Japanese - Anthy -г нэмнэ.

Ингээд л боллоо до. Ctrl+Space дараад にほんご гээд бичээд үзээрэй. Болсон байх учиртай.

Тайлбар
==================
[1] Input Method Engine

Тэнгэрийн орноор, түүнээс бас жаахан доохнуур

2010-01-08T00:25:00.004+08:00

Зураг дээр энүүхэн гүвээний цаахнээ уудам тал хөндий цэлийж байгаа нь тодорхой харагдана. Аль эсхүл асар том нуур дүн өвлийн хүйтэнд зайрмагтан мөстөөд, цасан хучлагаа зузаан гэгч нөмөрсөн нь ч юм шиг. Тэнгэр нь цэлмэж, нар нь илчээр аргадсан сайхан ч нутаг аа да... Ийм сайхан агаартай, тэнүүн тэлгэр нутагт чинь санаснаар болдог бол утаат Улаанбаатараа муу муухайгаас нь салгаад, нүүлгээд ирэхсэн. Юу ч болов, гүвээний орой дээр гарч, хавь ойрын барааг жаал ажиглая байз.

Өө дамшиг, уул шугамандаа энэ хөндий чинь Улаанбаатар минь байсан шив дэ. Гэр хороолол, дулааны станц, автомашин, үйлдвэр завод гээд ер нь бүх зүйлийнх нь утаа сүлэлдэн хөшиглөөд газрын гадаргаас нэг их дээшилж шалилгүй тунараад тогтчихсон нь энэ юм байж. За тэгээд утаат Улаанбаатарын талаар хүн бүр л нэгийг өгүүлж суудаг хойно, би энд давтаж бувтнаад ч нэмэргүй биз дэ хө. Зүгээр л цэвэр агаараар цээж дүүрэн амьсгалж, сэтгэл тэнүүн амьдрахсан.

Хэвлэлийн бизнесийн шинэ чиг хандлага?

2010-01-02T00:11:00.005+08:00

Номонд хорхойтой IT-ийнхэн болон хэвлэлийн бизнесийнхэн наашаа суугаарай ;) Та бидний сайн мэдэх "Прагматик номын сан" цувралыг эрхлэн гаргагчдын нэг Дэйв Томастай хийсэн нэн сонирхолтой ярилцлагыг чадлын хэмжээнд орчуулан хүргэж байна. Дэйв нь антрепренераас гадна програм хангамжийн ертөнц, тэр дундаа Руби болон Рэйлсийн бүлгэмд ихээхэн нэр нөлөөтэй нэгэн билээ. Бид түүнийг олон сайхан ном, нийтлэлээр нь эчнээ танина.

Сурвалжлагч буюу Сатиш Талим нь IT-ийн салбарт 32+ жилийн ажлын туршлагатай, Рубийн бүлгэмд ихээхэн нэр хүндтэй, програмч, лектор хүн юм байна. Руби програмчдад зориулсан rubylearning.com хэмээх маш сайхан сайт ажиллуулдаг. Мөн энэ сайтын блог буланд хэрэгтэй мэдээлэл олон байна билээ.

Ер нь эдгээр эрхмүүдийн үнэ цэнийн талаар workingwithrails.com-оос магадлан үзэх боломжтой. Ихээ дээгүүр давхидаг нөхдүүд бий ;) Орчуулгын хувьд санал хүсэлтийг дуртайяа хүлээн авна.

Мөн хэвлэлийн бизнес манайд ойрын ирээдүйд ямар өнгө төрхтэй болох бол? гэж дотроо олон янзаар төсөөлж суулаа. Хэвлэнэ гэдэг ч нарийн чимхлүүр, ажиллагаа ихтэй бизнес юм билээ. Харин автоматжуулчихвал?

Автоматжуулах зүйл байна уу? Хийгээд өгье ;)

Сатиш» Дэйв, өөрийнхөө тухай, хаана өсч төрсөн, одоо ямар алба хашиж байгаа талаараа бидэнд ярих уу?

Дэйв» Би Английн Чеширт[1] мэндэлсэн(Ливэрпүүлд өссөн). Бага байхад гэрийнхэн маань Канад, АНУ-д ажиллаж амьдарч байгаад, дунд сургуульд орохын минь үед эргээд Англи руу нүүсэн. Одоо санахнээ сургуульд шалтгалт авч, хүүхдүүдийг 2 бүлэгт (O бүлэг - 15/16 оноо, A бүлэг - 18 оноо) хуваан хичээл ордог байсан. Би нэлээд хэдэн хүүхдийн хамтаар O бүлэгт орчихлоо. Сургуулийн захиргаа ч маниудыг завгүй шамдуулахын төлөө олон зүйл сэддэг байжээ. Дүүргийн коллежд A түвшний(бүлэг) компьютерийн курс нээгдэх үест мань хэд ч далийж яваад, давхиад орлоо.

За тэгээд, долоо хоног өнгөрөв үү, гүй юу компьютерт дурлаж эхэлдэг юм байна. ASR-33 телетайпаар програмаа цаасан дээр цохиод, 110 бадын модемоор дүүргийн ICL мэйнфрэйм рүү илгээдэг байлаа шүү дэ, үнэхээр гайхалтай. Тухайн үед мэйнфрэйм дээр зөвхөн 5 хүртэлх тооны програм хадгалахыг зөвшөөрдөг байлаа. Ийм хязгаарлалттай болохоор явцын дунд өөр програмыг өөртөө агуулдаг, түүнийгээ гаргаад ажиллуулчихдаг нэг програм бичсэн, магадгүй энэ тухайн үедээ өөрөө өөрийгөө програмчилдаг дэлхий дээрх цорын ганц BASIC програм байсан байх ;)

Дараа зун нь дүүргийн усны газарт програмын ажил хийлээ. Удалгүй мэргэжлээ математикаас компьютерийн ухаан руу сольё гэж бодох болсноор Лондоны Империал Коллежд элсэн суралцсан. Эргээд харахад тэнд өнгөрүүлсэн хором бүр гайхалтай, өгөөжтэй байсан санагддаг юм(статистикийн хичээлээс бусдаар).

Сургуулиа төгсөөд дөнгөж байгуулагдсан жижиг компанид ажилд орлоо. Алба маань эхэн үес Англид төвлөрч байгаад, тун удалгүй дэлхийн улс орнуудаар явж ажилладаг болов. Бид нүсэр системийг хооронд нь, бас өөр бусад терминальтай(зарим нь веб толилуурын өмнөх хувилбар байсан байх) холбох шаггүй төвөгтэй ажил нэлээд хийсэн. Энэ бүхэн үнэхээр сонирхолтой. Мөн Британийн компьютер үйлдвэрлэдэг жижиг компанид янз бүрийн зүйл хийж өгч байлаа. Магадгүй энэ бүгдээс хамгийн сонирхолтой нь Халли сүүлт од руу илгээдэг Жиотто хиймэл дагуулын тоногт зориулж бүтээсэн жижиг интерфэйс байсан байх.

Нью-Иоркт төсөл дээр ажиллаж байгаад эхнэртэйгээ танилцсан. Удалгүй бид гэрлэж, эхнэр маань надтай цуг Англи явсан. Хүүтэй болоод Далласт(Техас муж, АНУ) ирж суурьшсанаас хойш даруй 15 жил өнгөрчээ.

Энди Хантын[2] хувьд бид 90-ээд оны дунд үест мөн төсөл дээр хамт ажиллаж байлаа, үүнээс хойш өнөөдрийг хүртэл мөр зэрэгцэн хөдөлмөрлөж явна. Хоёул нийлээд "Прагматик Програмч"[3] нэртэй ном бичсэн, компаниа ч мөн ингэж нэрлэсэн. Номыг бүтээх явцад боловсруулсан жор технологийг ашиглаад бид төд удалгүй, хэдхэн жилийн дараагаар хэвлэлийн бизнес эрхэлж эхэлсэн. Энэ маань яв явсаар, бидний үндсэн ажил маань болж хувирч байх шиг байна. Гэхдээ яалтгүй хорхойтой болохоор програм бичихэд цаг зав бас гаргана аа.

Сатиш» "Programming Ruby 1.9"-г хэнд зориулсан бэ? Рубийн сурах бичиг үү, лавлах материал уу, энэ хоёрын аль нь вэ?

Дэйв» Өмнөх хэвлэлт болон бас бусад зүйлийн талаар жаахан түүх өгүүлье. Рубийн талаар олж мэдсэн маань 10 жилийн өмнөх. Тухайн үед Японоос өөр газар мэддэг, ядахнээ дуулсан хүн байгаагүй байх. Энди бид хоёр уул нь нэг ном эхлүүлээд, эх бэлтгэх, автоматжуулах ажилдаа Рубийг ашиглаж байлаа. Нэг харахнээ Рубийн талаар бичсэн, тэмдэглэсэн зүйлс маань яг номын дайны болоод ирсэн тул, өмнөх ажлаа түр хойш тавиад, тэмдэглэлээ үргэлжлүүлсэн. Ер нь бол Руби сурахаар эрмэлзэж буй програмч хүнд зориулж бичсэн л дэ. Бас өөрсдөө ашиглаж байхаар: гол онцлогуудыг гүйлгээд харахаар, доороос нь(хувьсагч, if нөхцөл г.м) бус дээрээс нь(класс, обьект г.м) эхлэхээр. Мөн Руби програмчлалын орчны талаар: ялангуяа бодит практик, өдөр тутмын амьдралд хэрхэн ашиглах талаар. Рубийн класс, методуудыг мөн баримтжуулсан гэхээр ном маань хэд хэдэн номны бүрдэл ч юм шиг. Ямартай ч програм бичиж байсан туршлагатай хүнд бол ойлгомжтой, өгөөжтэй байх нь гарцаагүй. Сурах бичиг ч болно, хавсралт материал ч болно гэсэн үг юм.

Сатиш» Энэ ном маань эхний хэвлэлтээс юугаараа онцлог вэ?

Дэйв» Маш их зүйлээр! 1.9 хувилбарт маш олон сайхан боломж нэмэгдсэн шүү дэ, тэгэхээр яах аргагүй Рубийн болц байж таарна. Хуучин даяаршил(internationalization) гэдэг зүйлээр тун ядмаг байсан бол, одоо хавьгүй дээр болсон. Мундаг олон класс, методууд нэмэгдсэн. Би яс тоолж үзээгүй л дэ, багцаагаар заяамал(built-in) методууд өмнөхтэй харьцуулахад лавтай 2 дахин нэмэгдсэн байх.

Мөн түүнчлэн эхний хэвлэлээс хойш Рубийн бүлгэм, хэрэглэгчдийн далайц ихээ өөрчлөгдсөн. Ашигладаг хүн бараг байгаагүй үед, яаж хэргийг нь гаргах талаар бичнэ гэдэг ч бүрхэг байлаа шүү дэ. Ер нь бол мэдэх бүх зүйлээ л энэ номонд шингээхийг зорьсон. Одоо ч харьцангүй олон хүн мэддэг, хэрэглэдэг болж дэ.

Өнөөг хүртэл номтой холбоотой олон сайхан санал, зөвлөмж авсны дүнд аливааг тайлбарлах, таниулан бичих чадвар маань чамгүй дээшилсэн болов уу гэж хувьдаа их олзуурхаж сууна. Энэ удаагийн хэвлэлд хавсралт материалуудыг нэлээдгүй шинэчилж, бодит жишээгээр баяжуулж өгсөн. Ер нь бол чамлахааргүй сайн болсон гэж бодож байгаа шүү.

Нэг зүйлийг сонин болгож хэлэхэд "Programming Ruby 1.9" ном өмнөхийнхээ шинэ хэвлэлт нь бас биш ч юм шиг. Учрыг тайлбарлая. Рубийн шинэ хувилбар болох 1.9 нь 1.8-аа ерөнхийдөө шахах болов уу гэж бодож байлаа, гайхалтай нь одоо болтол 1.8 өргөнөөр ашиглагдаж байна. Номын шинэ хэвлэлт гарахад хуучныг нь лангуунаас татдаг, яалтгүй хэрэглээ байгаа учраас үлдээхээр болсон. Тэгэхээр "Programming Ruby 1.9"-ийг шинэ хэвлэлт гэхээсээ цоо шинэ тусдаа ном гэвэл болохоор байгаа биз?

Сатиш» "Прагматик номын сан"-гийн талаар?

Дэйв» "Addison Wesley" хэвлэлийн газартай гэрээтэйн үндсэн дээр "The Pragmatic Programmer" болон "Programming Ruby"-ийн анхны хэвлэлийг Дэйвийн хамтаар бичсэн. Бусад зохиогчоос ялгаатай нь фонт серифт, үлгэр, индеклэлт гэх мэт хэвлэлийн бүхий л ажлыг бид өөрсдөө хийсэн.

Ерөнхийдөө энэ ажлаар ном боловсруулах системийн ихэнхийг босгож авсан. Техникийн чиглэлийн ном зохиогчдын гаргадаг алдааг аль болох давтахгүйг хичээж байлаа. Номонд ашиглах соорс кодыг "copy+paste" хийгээд орхих бус жинхэнэ ажилладаг, тэр байтугай автомат тестээр соригддог байлгахыг хүссэн. Мөн номын агуулгыг соорс контроль, grep, diff зэрэг програмчийн багажаар удирдахыг хүссэн, өөрөөр хэлбэл хэвлэлийн эх маань цэвэр текст хэлбэрээр хадгалагдана гэсэн үг. Үүний зэрэгцээ эвтэйхэн формат, өнгө будагтай байлгахыг ч бодолцсон.

Номоо дуусгаад бид консалтингийн ажилдаа эргэн орлоо. Ажиглаад байхад програм хангамжийн төслийг амжилттай дуусгахад зайлшгүй шаардлагатай хүчин зүйлс болох нэгжийн сорил, соорс кодын удирдлага, автоматжуулалт зэрэг зүйлсийг ихэнх компаниуд хэрэгжүүлдэггүй нь гайхал төрүүлж байлаа. Ингээд эдгээрийг хөндсөн гурван ч ном бичиж эхэлсэн. "Addison Wesley"-тэй хамтарч гаргах байсан ч, бид бодлоо: Нэгэнт ном бүтээх технологи нь бидэнд байна, хэвлэлтэд өгөөд л, борлуулалтаа хийчихвэл болох юм биш үү гэж бодсон. Хэр хэцүү бол? Ингээд л хийсэн дэ. Үнэндээ эдгээр ажилууд тийм ч зөөлөн боорцог биш болохыг одоо ч алхам тутамдаа мэдэрч байна ;)

Гэхдээ бид чадсан. "Прагматик номын сан" бусдаас ялгаатай. Эхнээсээ л бид хөгжүүлэгчдэд чиглэсэн хэвлэлийн газар болохыг зорьсон. Бид хөгжүүлэгчийн багаж хэрэгслийг ашиглаж ном бүтээж байлаа. Зохиогчоор шинээр бүртгүүлэх тохиолдолд бид номоо бичих Subversion репо[4] үүсгэнэ. Текст засахдаа Word мэтийн програм хэрэглэхгүй шүү дэ. Үүний оронд эцсийн бүтээгдэхүүнийг бийлд хийх орц буюу маркап хэлээр шууд бичнэ. Зохиогчоос текстийг нь аваад, өөр хэн нэгнээр өрүүлэхээс энэ ихээхэн ялгаатай. Үүний ч үрээр манайхаар ном хэвлүүлэх нь өөр хаа ч байхгүй хурдан болсон. Хэрвээ зохиогч хүсвэл, хамгийн сүүлийн хувилбарыг дурын үедээ бийлд хийгээд л гаргаад авна, яг л принтерт комманд өгдөг шиг. Аль эсвэл автомат бийлдийн системээр тогтсон цагт гаргуулсан ч болох.

Бид ер нь автоматжуулах боломжтой юу байна вэ, бүгдийг автоматжуулсан. Жишээ нь зохиогч номынхоо сүүлийн хувилбарыг уншигчиддаа хүргэмээр байя гэж саная, тэгвэл ганцхан rake[5] комманд бичээд л номын pdf, mobi, epub[6] хувилбаруудыг интернэтэд байршуулах жишээтэй.

Эдгээр их олон автоматжуулалт, багажийн хүчээр бид ажилчдыг цөөн тоонд барьж чадсан. Үүний дүнд ном зохиогчийн гар дээр бузгай мөнгө тавьж таарна. Ер нь бол бусад хэвлэлийн газартай харьцуулахад 3-4 дахин илүүг гээд бод до ;)

Магадгүй, бид хэвлэлийн бизнес эрхэлж байгаагүй, дээр нь юуг яаж хийх ёстойг тухайн үед түй ч мэдэхгүй байсан маань шинээр сэдэх, аливааг өөр өнцгөөс харахад ихээхэн дэм болсон байх. Миний санаж байгаагаар бид хамгийн анхлан бүх номоо PDF(мөн epub, mobi) хувилбараар худалдаанд гаргасан. Мөн анхны бета-ном програмыг амжилттай хэрэгжүүлэгчид: ном бүтээгдэж байх явц дунд хүмүүст унших бололцоог олгосон. Электрон номондоо DRM[7] хийгээгүй анхны эрхлэгчид мөн л бид байх, үйлчлүүлэгчиддээ итгэх хэрэгтэй.

Миний бодоход одоо хийж байгаа бизнес маань үнэхээр сонирхолтой. Хүссэнээ сонгож, уншиж байгаад хэвлэнэ гэдэг үнэхээр супер биш гэж үү?

Сатиш» Магадгүй миний асуулт хэтэрхий эртдэж байж болох юм, гэхдээ эргээд харахад энэ номд нэмчихмээр, эсхүл хасвал дээр байж гэхээр зүйл байгаа юу?

Дэйв» Яг ч тэгж бодохгүй байна: Номыг дөнгөж сая бичиж дуусгасан, өмнөх хэвлэлтийн дутагдалтай зүйлсийг бүгдийг засч сайжруулсан болохоор тэр л дэ.

Номоо хоёр тусад нь салгадаг байж гэж хожуу бодож болох юм, гэхдээ нэг дороо байх нь дээр байх аа. Хэтэвчинд ч хэмнэлттэй.

Сатиш» Нэмж хэлэх ямар нэгэн зүйл?

Дэйв» Энд хэдийгээр зөвхөн номны тухай ярих ёстой ч Рубийн талаар бас дурьдмаар санагдлаа. Би энэ хэлэнд дуртай, хэдийгээр 10 гаруй жил ашиглаж байгаа ч одоо ч сонин сонирхолтой зүйлс гарч ирсээр л байна. Руби 1.9 олон сайхан боломжоор баяжсан шүү. Мөн өдөр тутам хэрэглэдэг багаж, хэрэгслээ үнэлж, хүндэлж, ач холбогдол өгч байгаарай гэж танай бүлгэмийнхэнд захья. Програм бичнэ гэдэг яриангүй сайхан ажил да.

Баярлалаа, Дэйв.

Хавсралт мэдээлэл:
======================================
Сурвалжлагын эхийг эндээс үзэх боломжтой. Эх материал нь доорхи нэмэлт тайлбарыг агуулаагүй болно.

[1] Сheshire - Английн баруун хойд зүгийн жижиг хот

[2] Andy Hunt. Pragmatic Programmers LLC-ийг үүсгэн байгуулагчдын нэг.

[3] Програм хангамжийн чиглэлийн номууд дундаа классикт тооцогдох бүтээл. Энэ номын талаар Очко багшийн бичсэн сайхан тэмдэглэл байдаг.

[4] Нэгэн үе өргөнөөр ашиглагдаж байсан соорс удирдлагын систем. Томоохон компаниуд өнөө ч түгээмэл ашигладаг юм билээ.

[5] Rake - Ruby Make. Бийлд автоматжуулалтын багаж. C, C++ дээр бол make, Java дээр бол Ant гээд л бид мэднэ дэ?

[6] mobi, epub зэрэг файлыг гар утас, PDA мэтийн төхөөрөмж дээр өргөнөөр ашигладаг. Миний хувьд Metaprogramming Ruby номын электрон хувилбарыг худалдаж авч байлаа. Гар утсан дээр уншихээр жаахан тухгүй л юм билээ. Гэхдээ ч саяхнаас электрон ном физик номоосоо илүү тоогоор зарагдаж байна гэдуга шт.

[7] Digital rights management (DRM) is a generic term for access control technologies that can be used by hardware manufacturers, publishers, copyright holders and individuals to try to impose limitations on the usage of digital content and devices. Эх сурвалж: Википедиа.

Хархулангийн бөгж

2009-11-19T23:57:00.003+08:00

Хархулангийн бөгж романыг өчигдөр худалдан авснаа, дэндүү сонирхолтой байсан тул, шөнө дунд болсныг ч үл анзааран нэг суурин дээр уншиж дуусгалаа.

Баларсан, өнгөрсөн, одоо хэмээх 3 үеийг нууцлаг боловч, уран сэжмээр гайхалтай сайхан холбож өгчээ. Тэр Хархулангийн цайз руу нэвтрэх хэсэг, Манжуурт амь сөрөн урагшлах эрэлхэг монголчууд, ухаант эмэг эх, аюулт зандалчдаас арга эвийн ухаанаар дутаах Хантайн адал явдал мэтээр үнэнхүү сонирхолтой сэтгэмж, дүр зураг цааш хөвөрнө...

Ахас өвгөдийг хүндлэх ариун заншил, чигч шударгуу баримтлал, улс түмний тусын тулд амиа ч золих агуу сэтгэл, хэлсэн ярьсандаа ямагт үнэнч байх чанар зэрэг өнөө бидэнд үнэхээр дутагдаж буй үнэт зүйлсийг уран үгс, утгын чимгээр бахдалтайяа гаргаж.

Үлгэр дандаа сайнаар төгсдөгийн адилаар зохиол маань ч гэрэл гэгээлгээр жарган байна. Зохиолч өөрийгөө Нирунзу хэмээн нэрийдсэн ба ямар аавын хэн гэдэг хүү болохыг мань үнэхээр мэдэж чадсангүй. Ямартай ч амьдралын хал чулуу, халуун хүйтнийг амсахаараа нэг болсон өндөр боловсролтой, зүрхэндээ галтай жинхэнэ монгол хүн(эр?) бололтой.

Хавтас, хэвлэлийн цаасыг имэрвээс байдаг л нэг номхон санагдах биз. Гэхдээ балын амт нь цагаан дээр хараар жирийсэн үгс, өгүүлбэрт байгаам. Уншаад үзэгтүн, утгын урныг мэдэрч, хавьд амсаагүй сэтгэлийн таашаалыг эдэлнэ гэдэгт миний бие бардам итгэж байна.

Номын цагаан буян дэлгэрэх болтугай!

Хавсралт:
=========================================

Зохиогч Нирунзу-н блог: Хугараагүй ноён нуруу
Хархулангийн бөгж онлайн хувилбараар
Зохиолын талаарх бусад хүмсийн сэтгэгдэл

Номын сайн нөхөрт дуулгах сонин

2009-10-26T02:03:00.002+08:00

Миний бие бээр үзсэн харсан шалихгүй, мэдэх чадахаар гавихгүй ч ном гээч ариун эрдэнийг хүндэтгэн дээдэлж, дурласнаа боломжийн хэмжээнд цуглуулж, уншиж ухамсарлаж явдаг нэгэн билээ. Монголын жирийн нэг ажилчин, албан хаагчийн төлөөлөл маньд хүссэн номоо захиалан авчруулах[1] бололцоо тэр бүр байхгүй. Сайн ном дор хаяад 50-с 60 ам.доллар гэхээр 2 ном аваад хоосон хонох уу, 2 номоо мартаад хоолтой хонох уу гэдэг дээр сонголт хийх шаардлага байнга гарна. Харамсалтай нь миний сонголт үргэлж 2 дахь нь :(

Бодит байдал иймийн атал ном унших хорхойгоо дарж ер чадахгүй нь. "Ном унших нь ариун үйл.", "Номын хулгайг хулгай гэдэггүй!" мэт хэн хэзээ зохиосон нь үл мэдэх хэлцээр гэмээ цайруулахаа аядаж, энд тэндэхийн вебээс уншья гэсэн номоо хурааж, цуглуулж суудаг. Хэдүй үнэ төлбөргүй татдаг ч, угтаа бол хууль бус үйлчилгээ ашиглаж байгаа санагддаг. Миний адил зовлонтой олон залуус бий.

Зөв болон буруу сувгаар хураасан олон e-номтой хүн чинь, тэднийгээ уншиж таарна аа да? Болж өгвөл гадуур дотуур явахдаа, хүн хүлээж суухдаа, автобус метронд зорчихдоо уншиж байхыг хүснэм. Жилийн өмнө наран улсад байж таарах үес, нэг найзтайгаа баахан судалсаны эцэст Sony дижитал е-ном уншигч[2] авахаар төлөвлөөд, хамгийн том электрон барааны дэлгүүр лүү гараад шидэж билээ. Хайгаад олсонгүй тул арга ядаад үйлчилгээний ажилтнаас асуухнээ худалдаанд байхгүй гэнэ, зөвхөн америк, европын холбооны улсуудаар борлуулагдаж байгаа сурагтай. Дэмий баахан холхиж байгаад харьлаа.

Тэр явдлаас тун удалгүй Amazon Kindle гарч ирсэн. Хорхой маш их хүргэж байсан да, хэдэн төгрөгөө гөвөөд, авлаа гэмээ нь Монголд маань татах терминаль байхгүй, байлаа ч нэлээдгүй үнээр ном худалдаж авах тул дижитал уншигчтай болох тухай асуудлыг тэгсхээд мартав.

Хэдэн сарын өмнө iphone-тэй боллоо. Нэг танилаасаа бартердаж авсан хэрэг. Урьд нь 20, 30 мянган төгрөгний үнэтэй, энгийн үйлдэлтэй, байдаг л бандгар Nokia утас барьдаг байлаа. Мессеж бичээд, ярьж л болж байвал ямар утас барих нь хэнд хамаа байна аа гэж боддог байв. Харин нэг төрлийн смартфон бариад, дээрх бодол маань энэ хэсэг хугацаанд зэгсэн өөрчлөгдөж байх шиг байна.

Дээр бичсэн зүйлсээс юуны талаар ярих гэж байгааг минь таамагласан байх. Энэ бол дижитал ном уншигч. Төлөөлөл болгож GoodReader, iCHM нэртэй 2 iphone/ipod програмыг танилцуулъя гэж бодлоо.

GoodReader
Good.iWare компанийн бүтээсэн PDF файл уншигч. Том хэмжээтэй(100MB-с дээш) документ дээр асуудалгүй ажилладаг гэсэн. Үнэхээр ч тийм юм билээ. Үүнээс илүүтэйгээр хэрэглэхэд их дөхөм. Дийлэнх iphone/ipod програмын адилаар өндөр usability-тэй. Productivity ангилалд: #1 in Japan, #3 in USA, #1 in France, #1 in Canada, #2 in Germany, #2 in UK гэнэ дэ ;)

Түүний чадах зүйлсээс дурьдвал:

huge PDF files
PDF Reflow - extracts pure text from PDF, lets you read it without page margins, without left/right scrolling, with font size of your choice
PDF Text Search feature
PDF Links - tap hyperlinks in PDF's and jump to places inside a document
huge 50x PDF zoom ratio, while image is still crisp. There's no better way to read big PDF maps or technical drawings on your iPhone
true full-screen reading - no bars or buttons over the text
PDF Table of Contents (Outlines)
Bookmarks
GoTo PDF Page
restores your location in all PDF files
choose between manual or automatic screen rotation
Horizontal Scroll Lock - great for reading multi-column pages
innovative Tap Zones technique (page dragging can be avoided)

GoodReader-т файл байршуулах арга хэлбэр:

USB
WiFi
direct Web downloads
accessing e-mail attachments
MobileMe iDisk, FilesAnywhere.com, MyDisk.se and other servers
iPhone-to-iPhone via WiFi using WebDAV

Ашиглах үеийн дүр төрх:

Дэлгэцийн баруун дээд буланд - GoodReader. Ном авч явна, уншихаар нээнэ гэдэг утас цохих хэмжээний хялбархан үйлдэл болж ;)

"Browse the Web" сонголтоор ороод хэдэн ном татаад авъя.

Нэгэнт Wifi-аар холбогдож болох тул лаптопоо сервер болгоод, хэдэн ном хуулсан байдал.

iphone/ipod-доо ном хуулсан байдал.

Ямар нэгэн ном нээвэл, хавтас нь байгаа чигээрээ л харагдаж байна.

Ингээд л уншаад байна да...

Олон товчийг бас нууж болно. Номын харагдах байдлыг хөндлөн, босоо болгож хүссэнээрээ солих боломжтой.

Аль нэг хуудас руу очих, гарчиг дамжин үсрэх, текст хайх зэрэг өргөн боломжтой.

- - - - - - - - - - - - - - - - - - - - - - - - - - - - - -- - - - - - - - - - - - - - - - - - - -

iCHM
Зэ, орой ч болж, унтах ч болж. iCHM-ийн талаар ер нь дэлгэрэнгүй танилцуулах шаардлагагүй гэж бодож байна. Windows Help File форматаар бичигдсэн буюу chm файлыг нээж унших програм юм билээ. Lite хувилбар нь үнэгүй, гэхдээ нэг л файл хадгалах хязгаарлалттай. Хэдүй хязгаартай ч уншаад болоод л байх юм билээ шүү. TOC буюу Товъёг дэмжинэ.

Ашиглах үеийн дүр төрх:

Ном нээх үест иймэрхүү байдалтай.

TOC дэмжинэ ээ гэж байгаа. Шилжилт хийхэд л амар юм да...

Дүгнэлт:

Ном уншъя гэвэл нь ямар нэгэн зүйлд төдийлөн баригдахгүй болж байна. ipod тань хэдэн зуу, магадгүй мянгаар тоологдох номтой арвин либрари болж хувирах нь.
Автобус унаанд явах, хүн хүлээж суух зэрэгт аятайхан, амьдралд тустай хийх зүйлтэй болох нь.
iphone/ipod багагүй үнэтэй. Гэхдээ авч болох ямар арга зам байнав, хайх л хэрэгтэй. Миний хувьд, нэг гадаад нөхөр эх орондоо сонин хэвлүүлнэ, монгол ахуйн зураг хэрэг болоод байна гэхэд нь өөрийн дарсан хэдэн гайгүй зургаа өгсөн. Бартерийн шугамаар хэн хэндээ ашигтай наймаа хийсэн шүү.
Оюутнуудад сайхан шпаргалка, багш хүнд санаа тавих бас нэг зовлон нэгээр нэмэгдэв бололтой ;)

Тэмдэглэл:
[1] Амазоноос ном захихад ямар нэгэн асуудалгүй ч болоосой. Тээвэр, харилцаа цэгцрээгүй манай руу бараа татахад замын зардал нь барааныхаа үнээс даваад явчихдаг тал бишгүй юм шиг байгаам.

[2] Sony digital book reader. Бас л сайхан амьтан байна лэ. Гэхдээ жилийн өмнөхөөс хавьгүй өөр болж, сайжирч байгаа бололтой.

Bash use case: Downloading Railscasts

2009-10-22T00:56:00.002+08:00

Сүүлийн хэд хоног Rails-ийг нилээд эрчимтэй үзэж байна. Жилийн өмнө нэг ном уншсан, хэргийг нь гаргахгүй байсаар бараг мартаж орхиж. Уул нь бол зөндөө л ном байна, бүгдийг нь ухаад суухаар нэлээд цаг зарах шинжтэй. Харин rubyonrails.org-ийн документац хавиар хэсч яваад, Railscasts хэмээх нээлттэй видео хичээлтэй нэлээдгүй хэрэглүүштэй сайт байдгийг мэдэж авлаа.

Хичээлүүд нь их ойлгомжтой, амьдралтай. Товч бөгөөд тодорхой. Янзтай. Харин вебээр үзэхээр энд тэнд дарж, хуудас лоод хийхийг хүлээж суух нь жаахан залхуу хүрмээр. Болдог бол бүгдийг нь татаж аваад(import into media player list), эхнээс нь дуустал үзэх юмсан. Ер нь хоёр дэлгэцнийхээ нэг дээр нь гаргачихаад, хэрэгтэйг нь тогтосхээд үзээд байвал нь тун догь, цаг хугацааны хувьд хэмнэлттэй ч юм шиг, нэг сумаар хоёр туулай буудах тухай л яриа юм.

Сайтын html кодыг сонжихнээ тун цэгцтэй санагдсан тул жижиг робот бичээд, гүйлгэчихмээр санагдлаа. За ингээд гялс нэг скеч бичээд, жаахан дебагдаж, зүгшрүүлээд бидний робот бэлэн боллоо:

railscast_video_downloader.sh
Энэ скриптийн эх миний git repo дээр бий.

Кодын мөр бүрийг тайлбарлалтгүй байх аа, хараад л ойлгох биз. Гэхдээ скриптийн онцлогоос дурдъя:

Бүх видео хичээлийг татна. Хуудас дамжин crawl хийнэ.
Татац ямар хавтаст хураагдахыг тохируулах боломжтой. Одоогийнхоор бол скрипт байгаа газарт 'movies' хавтас үүсгээд, түүний дотор цуглуулна.
Татах хурдыг тохируулна. 20K/s гээд хязгаарласан тохиолдолд хавь орчиндоо балаг тарихгүй.
Таталт хооронд бага зэрэг амсхийнэ. Серверт тустай байж болох юм.
Татсан файлыг дахин татахгүй. Харин дутууг зогссон газраас нь үргэлжлүүлнэ. Тийм болохоор асааж, унтрааж, хэдэн өдөр дамнуулан ажиллуулсан ч болох нь!

За ингээд хичээлээ үзье:

Татаад авчихсан болохоор гэрийн интернэт удаан байх нь эрдэм номд шимтэх ариун үйлсэд саад болж үл чадмой ;)

Видео нь чанартай, бичлэг сайтай юм гээч! Өөр, өөрийн онцлогтой 180 хичээл байна. Сайхаан!

Тэмдэглэл:
Очко багшийн бичсэн "Ruby use case : Downloading Монголын Нууц Товчоо"-г сонирхоорой. Богинохон, цэгцтэй програм бий.

Линукс - хөгжүүлэлт хийхэд нэн таатай орчин. Хийх ёстой зүйлээ юунаас ч илүү хийх олон жижиг програмын цуглуулга. Эдгээрийг өөр хооронд нь угсарч, залгаад нилээд төвөгтэй ажиллагааг тун амархан шийдчихнэ. Бүтээмжийг их өргөнө. Юникс философи гэж тусдаа лут сонирхолтой сэдэв бий. Энэ талаар пост бичихээр төлөвлөөд, материал цуглуулж байна.

Загварын шоу үзэж баймаар юм байна

2009-10-17T01:53:00.001+08:00

Өнөөдөр Говь ХК-иас зохион байгуулж буй Fall/Winter 09'10 Fashion Show-ийг сонирхлоо. Амьдралдаа анх удаа загварын шоу үзэж байгаа минь энэ юм. Гайхалтай сайхан байлаа.

Угтаа бол миний бие хувцас урлал сонирхдоггүйн дээр, загвар өмсөгчдийг тэнгэрийн явдалтай, тэнэгдүү байрын хүмүүс гэж төсөөлж явдаг. Алдаа байсан шиг байна аа, найзууд аа. Уучлаарай ;)

Дизайнер хүний ур ухаанаа шингээсэн бүтээлийг амилуулж буй эдгээр бүсгүйчүүлийн донжтой алхаа, мэргэжлийн үзүүлбэр цаанаа л нэг эрч хүчтэй, урам зоригтой юм. Үзсэн хүний нүд баясч, сэтгэл сэргэмээр. Ялангуяа сонгодог хөгжмийн аянд, үдшийн даашинзтай бүсгүйчүүл маань ямар сайхан харагдаж байсан гээ? Үнэнхүү бахадмаар. Гоо сайхан ертөнцийг аварна аа гэдэг нь ер нь үнэн байх. Танхим дүүрэн хүн нижигнэсэн алга ташилтаар талархал илэрхийлнэ лэ. Загвар өмсөгчдөөс гадна дизайнер, арга хэмжээг зохион байгуулагч нарт их сайхан урам болсон байх.

Бодохнээ, загварын шоу үзэж баймаар юм байна. Залуу нас, өнгө жавхаа бидэнд эрч хүч өгөхгүй гэж үү? Ер нь л гоё мэдрэмж... Үзүүлбэрийн дараа эрчүүд эхнэртээ ганц аятайхан цамц аваад өгчиж баймаар юм билээ, сайхан л бэлэг болно.

Цөөн хэдэн зураг дарсныгаа та бүхэнд сонирхуулъя. Ер нь урлагийн тоглолт зэрэг анивчсан, гялалзсан, нөгөө талаар гэрэл багатай орчинд сайн флаш, линзгүйгээр чанартай зураг авна гэдэг их хэцүү эд бололтой. Блюртэй гараад ер болдоггүй, ISO 1600 -аар л авлаа да. Түүнээс гадна камерны зай дуусаад яг өнөө үдшийн даашинзтай оргил хэсгийн зургийг дарж чадаагүй :( Чамлахаар чанга атга!

Зураг №1. Загвар өмсөгч . . . . . . . . .
(Butterfly)

Зураг №2. Загвар өмсөгч . . . . . . . . .
(Lady Brown)

Зураг №3. Загвар өмсөгч . . . . . . . . .
(Once in America)

Зураг №4. Загвар өмсөгч . . . . . . . . .
(Lady Purple)

Зураг №5. Загвар өмсөгч . . . . . . . . .
(Jet Li? )

Зураг №6. Загвар өмсөгч . . . . . . . . .
(Beauties)

Зураг №7. Загвар өмсөгч . . . . . . . . .
(Alaska?)

Зураг №8. Загвар өмсөгч . . . . . . . . .
(Metropolitan)

Тэмдэглэл: Загвар өмсөгчдийн нэрийг мэдэхгүй тул зургийг дугаарлан, нэрийн оронд цэг тавьлаа. Таних хүний тань зураг энд тавигдсан бол нь нэрийг нь комментоор үлдээнэ үү. Зурагнуудад нэр санал болгосон ч бас болох.

2009.10.16

Зураглаач болов оо, би ;)

2009-07-27T00:07:00.000+08:00

Өвөл цөөн хэдэн сар томилолтоор Японд ажиллалаа. Токио хавийн өвлийг ч ямар өвөл гэхэв, цайрах цасны барааг тэнд ер нь харсангүй. Зуны ботинктой туусаар л байгаад ирлээ. Богино буюу 3 хүртэлх сарын хугацаагаар Японд ажиллаж амьдарвал нь их сонирхолтой, харин түүнээс жаахан удвал мань мэт нь баахан уйдах шинжтэй.

Эргээд бодоход зөв бодолтой, шижигнэсэн сайхан залуустай хамтран ажиллаж байжээ. Одоо ч тэдгээр эрхэм хүмүүстэй холбоотой байж, гэр орноор нь хааяадаа зочилж, мэнд устай явахыг боддог. Очих бүрт хоол цай болон, төрсөн дүү шигээ хүлээн авч, шөнө хугаслан элдвийг хөөрөх ах эгчтэй би ч азтай хүн юм. Гоби, Галаа, Батака, Очко нарын хүмүүс, тэдний гэр бүлийнхэнд би ер нь нэлээдгүй өртэй дэг.

12 сарын дундуур Гобийнд яваад очлоо. Бас л дайлуулж, цайлуулж, хүндэрсэн нь ойлгомжтой, ккк. Нөхөр нэг бандгар хар[1] юм авчихсан байна. Эргүүлж тойруулж, түүнийгээ тайлбарлана, зураг авч үзүүлнэ. Авсан зурагнууд нь ямар ч гоё юм, ямар ч тод юм. Бүр хорхой хүргэчихлээ. Хэд дарж үзэв. Тансаг!

Хэд хоногийн дараа нөхрөөс линк ирэхнээ, Вимомн.нэтэд[2] гэрэл зураг сонирхогчдын клуб байдаг аж. Бүртгүүлээд л авлаа. Фото зурагчдын зайлшгүй мэдэх ёстой онолоос авахуулаад, төрөл бүрийн хичээлүүдийг цуврал болгон системтэйгээр оруулжээ. Хичээл болгон даалгавартай, доор нь гишүүд авсан зургаа тайлбартай оруулснаар, сонирхолтой хэлэлцүүлэг энд тэндгүй өрнөж эхэлсэн байна. Клубын зохицуулагч нь английн хамгийн алдартай фото студид мэргэжлийн зурагчнаар ажиллах Эбэ[3] хэмээх монгол залуу байна. Гишүүд түүнийг багш аа хэмээн авгайлах ба нөхөр ч хүмүүсийн ур чадварт тааруулан маш гоё зөвлөмж бичих юм. Харин манай Гоби өсөх ирээдүйтэй мундаг зураглаач-сурагч болчихсон, фото сонирхогч дундаа ихэд нэр хүндтэйд тоогдоод бас ч гүй Токио хотоор фото экскурс зохион байгуулан, түмний манлайд гялалзаж яваа нь клубын үйл ажиллагаанаас тодхон харагдах ажээ.

За тэгээд, горхой хүрээд еөр болдоггүй. Нэг бандгар хартай болохоор шийдлээ... Амралтын өдөр дамнуулдан Амазон DSLR[4] хэсгийн сэтгэгдэл, дүгнэлтийг нэгийг үлдээлгүй шүүв. Уншиж уншиж төсөр үнэ, өндөр рэйтингтэйгээр нь Nikon D40-г[5] тоочигдлоо. Клубынхнаасаа энэ аппаратны талаар санал асуухаа бас мартсангүй. Үлэмж том плакат хэвлэх гээгүй л бол өндөр пиксельтэй аппарат төдийлөн шаардлагагүй гэнэ, DSLR л бол DSLR, зурагчны өөрийн техник ур дүй чухал. Тэгээд ч сайн гэрэл зургийг 100% гэвэл нь мэдрэмж-50%, гэрэл-40%, техник-10% хувийг нь бүрэлдүүлдэг юм байна. Ер нь эхлэн сурч байгаа хүн учиргүй үнэтэй аппарат хөөх нь амьдралдаа жолоо барьж үзэлгүйгээр Ламборгини худалдаж авахтай утга нэгэн гэнэ ээ. Би ч хайран Ламборгиниг яйрин ямбий болгоё гэж санасангүй D40-дээ сэтгэл ханалаа, ккк. (Ер нь D80, 90 авчих мөнгө байсийм болов уу? ;)

Нутаг буцахаас 2 долоо хоногийн өмнө, Sofmap[6]-аас хуучин D40 боди-г, 18-55mm, 55-200mm 2 линзийн хамтаар боломжийн хямд худалдаад авчихлаа. Дараад л эхлэнэ шүү дэ. Эхний оролдлогууд баахан бүтэлгүй. Зураг авах ч зугаа төдийхөн зүйл биш бололтой дог оо. Үүнээс хойш авсан хар аппаратаа өглөө оройгүй үнгэж явсаар өнөө shutter speed, focal, white balance-ийн уялдааг овоо гайгүй ойлгож эхэллээ.

Ингээд сав л хийвэл аппаратаа цүнхлээд, үүрч явдаг болов. Хүн хар эгнүүлж зогсоогоод, болсон болоогүй шархийлгээд яваад байхаар хавь ойрондоо зурагчин хэмээн тоогдох аястай. Хэдэн зуугаар нь патиар дараад, дарсандаа дүгнэлт хийгээд байхаар арга барил маань яах аргагүй тогтмол дээшилж байх шиг санагдана. Гэнэтийн тохиолдолд, ялангуяа гэрэл багатай орчинд хөрөг зураг дарахаар олигтой үр дүнд хүрэхгүй байх нь бас бий.

Өнгөрдөг 5 сард "Үзэмжит байгаль" нэртэй фото зургийн уралдаан вимомн.нэтэд зарлагдлаа. Клубынхан гайгүй идэвхитэй оролцож байна. Хаврын орог саарал өдрүүд, хангай дэлхий ногоорч амжаагүй үес, дөмөгхөн зураг авч чадахгүй л яваад байлаа. Нэг амралтын өдрөөр лагерийн хойд дэнж өгсөөд, жаал зураг дарлаа. Гурван зураг сонгож байгаад, уралдаанд өгснөөс "Баянголын ам өгсөөд, толгод тонгойх агшинд..." маань 2-р байрт шалгарчээ. Бөөн баяр. Клубын гишүүд баяр хүргэж, зурвас бичээд л, нэг хэсэг додигор суув.

"Баянголын ам өгсөөд, толгод тонгойх агшинд..."
Зураглаач: С.Баттөр

Саяхан уралдааны шагнал болох "The Digital Photography Handbook"[7] нэртэй сайхан номыг хүлээн авлаа. Эбэ багш маань урмын үгсээр хавтсыг нь мялаагаад, гарын үсгээ зуржээ. Их баяртай байна. Хамт ажилладаг, бас фото сонирхдог ах хүүд[8] номоо гайхуулж, хорыг нь жаал малтаад авахаа бас мартсангүй ээ гэж, ккк...

Ингээд Вимомн.нэтийн гэрэл зураг сонирхогч андууддаа их баярлалаа. Мөн намайг "уруу татсан" Гоби ахдаа талархъя ;)

Эцэст нь хэлэхэд, фото зургаар хичээллэх тун сонирхолтой юм байна. Шинэ газар орон үзнэ, шинэ хүмүүстэй танилцана. Мөн өмнө нь анзаардаггүй, хайхардаггүй байсан олон гайхалтай зүйлсийг эргэн таних, мэдрэх боломжийг олгоно. Ер нь залуу нас, аз жаргал, гэр бүл, хайр энэрэлийн торгон мөчийг гэрэл зурагт мөнхөлнө гэдэг өөрөө их буянтай үйл байх. Гэрэл зургаар хичээллэцгээе, залуус аа.

Үүнийг уншиж байгаа найз нөхөддөө өөрийн сурсан багахан мэдлэгээ хуваалцахад бэлэн байна. Аппарат дагалдах хэрэгслийн хувьд жаахан үнэтэй байж болох ч, алдаад туучихсан торгон мөчүүд түүнээс ч үнэтэй болох цаг үе ирэх ч юм бил үү, хэн мэдлээ. Ухаан алдам үнэтэй хөөрөг, хурдан морьноос л лав хамаагүй нийтлэг хобби нь лавтай. Дарсан зургаа бариад явахад дэлхийн хаана ч нэвтрэлцэх нь ойлгомжтой. Гэрэл зураг цаг хугацаа, орон зайг эгнэгт мөнхөлмой.

Миний болон журмын нөхдийн фото цоморлиг
============================================

Миний твитпик: http://twitpic.com/photos/battur
Flickr хуудас маань баахан замбараагүй байгаа, цэгцэлж дуусгаад хаягийг нь комментоор оруулъя.
Буянцогтоогийн фликр хуудас
Ганаагийн фликр хуудас
Гобийн фликр хуудас
Мөнхцэцэгийн фликр хуудас
Сүхбатын фликр хуудас
Эрдэнийн фликр хуудас

Тайлбар
============================================
[1] Ихэнхи мэргэжлийн аппарат хар өнгөтэйн дээр, сонирхогчийнхоос овор хэмжээний хувьд хавьгүй том байдгаас ингэж нэрлэх болсон нь лавтай.

[2] Япон улсад сурч, ажилладаг монголчуудын дунд түгээмэл хэрэглэгдэх SNS сайт. Ер нь л халуун ам бүлийнхэн шүү. Сайхан охид бүсгүйчүүл олон байдаг шиг байна лэ, одоогийн байдлаар хэн нэгэнтэй нь танилцаж амжаагүй л явна, ккк...

[3] Эрдэнэбат. Мэргэжлийн зураглаач. Мэдлэгтэй, тулхтай энэ залуутай биечлэн уулзсан, ядахнаа зүсийг нь таних хүн манай клубт байхгүй л болов уу. Сайхан зөвлөгөө бичдэг ч, өөрийнхөө хөрөг болон авсан зургаа ер үзүүлдэггүй нууцлаг гайхал.

[4] A digital single-lens reflex camera (digital SLR or DSLR) is a digital camera that uses a mechanical mirror system and pentaprism to direct light from the lens to an optical viewfinder on the back of the camera. Эх сурвалж: Википедиа.

[5] DSLR ангилалдаа хамгийн хөнгөн нь. $450 орчимд 18-55mm линзтэй нь худалдаад авчихна. Гэрэл зураг дөнгөж сонирхож байгаа над шиг бойтогтой хүүхдүүдэд яг тохирох аппарат.

[6] Япондоо их олон салбартай, электрон барааны дэлгүүр. Токио, Акихабарад гэрэл зургийн хэрэгслээр дагнасан хуучин барааны(中古) дэлгүүр бий. Сонголт арвинтай, давгүй мухлаг байдаг шүү ;)

[7] The Digital Photography Handbook
Хажууд нь талархлын үгсээ байрлуулчихъя ;)

[8] Мундаг менежер, salesman. Түүний Flickr хуудсаар зочлоорой.

NERDTree: Vimд дурлагсдад зориулав

2009-06-30T09:06:00.000+08:00

Юникс орчинд ажиллаж, амьдардаг хүмүүс ямар текст засварлагч ашиглаж байна вэ? Миний хувьд консоль хавиар нутаглаад бүтэн нэг жил болох гэж байна. Серверт гаднаас холбогдож програм бичдэг болохоор яах аргагүй CLI[1] бүхий текст засварлагчийг түлхүү ашиглана. Түг түмэн засварлагчаас харин алийг нь вэ?

Vim. Vi Improved. Үнэхээр супер програм. Ажил хөнгөвчлөх маш олон комбинаци, өргөтгөх боломж зэрэг нь сэтгэл ихээр татна. Бараг өдөр болгон шинэ комманд, shortcut-тай танилцаж байх аястай. Төдүй хэмжээгээр ч ажлын бүтээмж дээшлэх юм. Өнөөдрийн байдлаар би гэдэг хүн бүх боломжийнх нь лав 5 хүрэхтэй үгүйтэй %-ийг л ашиглаж байгаа. Тэгээд бодохоор, гүй э мөн дундаршгүй далай яа? Хакерууд Textmate[2] .vs. Vim хэмээн мөнхөд харьцуулан ярих нь аргагүй ч юм уу?

Анхлан Vimдэх үест хавтас дамжин файл засварлах нь их төвөгшөөртэй санагддаг. Байн байн cd хийж, файл хааж нээгээд байхаар, сүүлдээ түүндээ дадаад ч байх шиг. Тэгснээ үүнээ жаахан хялбаршуулж pushd цохиж баахан таваргах жишээтэй. Арай гайгүй болоод screen, Vim-ийн split, tabe зэргийг цохино.

Хэд хоногийн өмнөөс чөлөө цагаараа Rails-аар жижиг апп хийж эхлэв. Олон үе бүхий хавтасны бүтэцтэй, ийшээ тийшээ их шилжиж ажиллаж байгаа болохоор :tabe ~/path1/path2/path3/path4/yoohhh-finally-filename мэтээр удаа дараалан цохих үнэнхүү залхуутай болоод ирлээ. Vim-ийн файл брауз хийх олигтой плагин олдохгүй золтой Emacs[3] руу урвачихсангүй ;)

Явж явж NERDTree гэх плагины сургийг гаргав. Vim-full[4] дээр автоматаар суусан байдаг боловч, байгаа нь хуучин хувилбар нь юм байна. Шинийг нь эндээс татаж авч суулгаад, баруун солгойгүй ашиглаж эхлэх нь тэрээ. Одоо хавтас хооронд шилжиж, файл нээхээс амархан зүйл үгүй боллоо ;)

Тайлбар
=====================
[1] CLI - Command Line Interface. Товчгүй, хулганагүй, зөвхөн комманд цохиж ажиллах интерфэйс гээд ойлгоход болно. Дээр үеийн програмууд бүгд ийм интерфэйстэй байсан.

[2] Textmate - The Missing Editor for Mac OS X. Мак компьютерт суулгаж ашиглах боломжтой супер засварлагч. Миний хувьд ашиглаж байсан удаа байхгүй, МакВорлд-д бурхан Буддагаас ч илүү алдартай.

[3] Emacs - Extensible, customizable text editor—and more. Бас л ашиглаж үзээгүй. Очко сэнсэйн блогоос мөн нэг чимээгүй гигант болохыг мэдэж авсан.

[4] Линукст суусан ирдэг Vim нь цомхон, нэмэлт сангүй. Ойр зуурхан хэрэглэж байгаа хүмүүст бол Vi-ээс нэг их ялгагдахгүй, тийм ч болохоор амт нь мэдрэгдэхгүй. Мэдрэе гэвэл Убунтучид sudo apt-get install vim-full комманд өгөөд, хэрэглээд үзээрэй.

Төгсгөл
=====================
Vim сайн, харин бусад нь муу гэж огт хэлээгүйг минь анзаараарай ;) "Ямар засварлагч сэтгэлд тань хамгийн их ойрхон байнав, түүнийгээ сонгож аваад тултал нь ашиглаж сурахыг хичээгээрэй. Ингэвэл бүтээмжээ 200% нэмэгдүүлж чадна, харин юм юм рүү үсчээд байвал, юм юмны л дундуур болно." гэж ESR-ийн номноос бас уншиж байсан юм байна. Vim.Lovers-т амжилт хүсье.

Жоорж Оруэлл - Эзнээ сольсон нь

2009-06-23T01:04:00.000+08:00

Хэд хоногийн өмнө 10,000 төгрөгөөр Жоорж Оруэлл - Эзнээ сольсон нь, Шолохов - Дөлгөөн Дон I,II, Жюль Верн -Дэлхийг тойрсон 80 хоног, Дашдэлэг, Октябрь нарын - Орон орны хоол зэрэг нэлээд хуучны номнууд худалдаж авлаа. Хэвлэгдээд өчнөөн жил болсон ч эдэлгээ нь харин шинээрээ шахуу юм, магадгүй хаа нэг аймгийн төвийн номын санд он удаан жил дарагдаж хэвтээ биз. Харин өнөө шинээр хэвлэгдсэн ганц ном л 15,000 төгрөг буюу эдгээрийг авдгаас хавьгүй үнэтэй байгаа.

Шинээр авсан номнууд

....Хэдэн жилийн өмнө Хятад руу гаргахаар зэхэж байсан вагонд гаалийнхан шалгалт хийхэд 40тоннын контэйнер дүүрэн ховор уран зохиолын номнууд гарчээ. Одоо бидний эрээд олддоггүй дээхэн үеийн мундаг зохиолч, орчуулагчдын гайхамшигтай бүтээлүүд зүгээр л урд хөршийн 00-ийн цаасны үйлдвэрт түүхий эд болон ачигдсан нь тэр байж. Тэр чигтээ гараад явчихсан бол, гөө мөн хайран аа. Магадгүй өмч хувьчлалаар номын сангийн барилгыг хувьчилж авсан нөхөр тавиур дүүрэн номоо яажшуухан хэдэн цаас болгох аргаа олж ядаж ядаж, эцэст нь урагш ачуулах "супер" шийдэл олсон нь тэр байх. Ачаа ч хураагдаж, хэдэн жилийн дараа арай сэтгэлтэй хүний ч гарт очиж. Номонд хорхойтой хүмүүс энэ хуудсаар нэг ороод гараарай.

Ингээд ном авсан өдрийнхөө оройноо "Жоор Оруэллийн Эзнээ сольсон нь"-ийг уншиж дуусгалаа. Бурангуй нийгэм, түүний үр урхагийн талаар энгийн үгээр, тун ч ёжтойхон бичсэн зохиол аж. Сайн ч орчуулсан байна.

Гол баатрууд

Английн хөдөө тосгон, ноён Жонсын ферм. "Өөдгүй" архичдад зарагдсаар залхсан амьтад хувь заяандаа их л гутарцгаах аж. Мажор нэртэй бодон үхэхийн өмнө энэ насныхаа мөрөөдлийг амьтдад ярина. Бослого гаргаж, хүмсийг хөөж явуулаад бүх амьтад тэгш эрхтэйгээр, хувь заяагаа өөрсдөө мэдэж, баян цатгалан амьдрах тийм сайхан цаг үе хэзээ нэгэн цагт ирэх тухай хүүрнэнэ. Бодон өнгөрөөд удалгүй амьтад бослого гаргаж, фермийн хяналтыг гартаа авна. Бүх амьтад тэгш эрхтэй ба нэг амьтан нөгөөнхөө амийг хөнөөхгүй байх, ор хөнжил, хувцас хунарыг хэзээд хэрэглэхгүй гэх мэт 7 заалттай хуулийг бүх нийтээр батална. Өөрсдийгөө хамгийн ухаантай нь гэж тас мэлзэх гахайнууд удалгүй шийдвэр гаргах бүхий л эрх мэдлийг авах ба ферм тун аажмаар урьд байснаас ч бүр дор боолын газар болж хувирна. Бусад амьтад үүнийг эс анзаарах бөгөөд одоогийн нөхцөл байдал нь ямар ч болов Жонсын үеийнхээс хавьгүй дээр гэдэгт итгэсээр байх болно. Хуучин батласан хууль нь "Бүх амьтан тэгш эрхтэй, түүний дотор гахай бүр илүү тэгш эрхтэй" гэсэн марзан тунхаг болсныг хэн ч үл анзаарах ажгуу.

Зохиогч(1903-1950) тухайн үеийн Сталин, түүний тойрон хүрээлэгсдийн бий болгосон тоталитар тогтолцоог шүүмжилж ийн бичиж байжээ. Бүр номын баатруудаар тодорхой хүмүүсийг хүртэл төлөөлүүлсэн нь байх юм. Харин миний бодоход энэ номон дээрх бүх зүйл манай Монголд биежилтээ бүрэн олоод байгаа юм шиг... Төрийн албан тушаалыг хувьдаа урвуулан ашигладаг, хувийн компани шигээ ойлгодог ухнууд. Хүчээр дарамтлах олигархиуд, хүний амийг нохой хуцахын дайтай үл ойшоох муйхрууд. Дарлагдсаар, мунхарсаар нөхцөл байдалтайгаа нэгэнт эвлэрч эхлээд буй хүн зон. Ай да, гурвалжин дөрвөлжин алаг эрээн хорвоо юу?

Харин та юу гэж бодож байна?

========================================
Хавсралт:

Зохиол нийт 10 бүлэгтэй ба, бүлэг тус бүрийг тун эвтэйхэн хураангуйлсныг эндээс үзэж болно: http://www.online-literature.com/orwell/animalfarm/
Номын хавтасны зургийг тун удахгүй тавих болно ;)

Sudo Make Me a Sandwich

2009-06-05T10:42:00.000+08:00

Линукс програмчдад зориулав.
Эх сурвалж: 25 Best Programmer WebComic Strips

The Memory Book

2009-01-04T09:34:00.000+08:00

(vimomn.net-д 12 сарын сүүлээр бичсэн тэмдэглэл)

Саяын амралтын хоёр өдөр санах ой сайжруулах талаархи зөвлөмжтэй маш хөөрхөн ном нэгийг уншлаа. Аль дивангарын буюу 1974 оны хэвлэл байна, зохиогч нь Harry Lorayne & Jerry Lucas нар аж.

Солих, линкдэх болон peg системүүдийг ашиглаад ямар ч зүйлийг хялбархан тогтоож болдог юм байна, хамгийн гол нь тогтоох зүйлээ аль нэгэн сайн мэдэх зүйлтэйгээ холбоод зураг болгон төсөөлөх, оюундаа өнгө нэмэн дүрслэх явдал ажээ.

Өчигдөр гучин зургаан оронтой тоог гурван минутад цээжилж, араас урдаас нь шууд хэлж үзэв. Болж байна. Мөн 20 гадаад үг хэдхэн хоромд дэс дарааллаар нь тогтоогоод, яг тэд дэх үг нь тэр гээд хэлж чадаж байна лэ, сонирхолтой нь өнөөдөр ч тэднийг тод санаж байна. Бас календарь гэдэг зүйлийг огт ашиглахааргүй болов. Энэ мэт техникүүд бүгд энд бичигдсэн байна

Жишээ нь 2009 оны календарыг "Ertiid Ulmaa galiin och urdiish" гээд цээжилчихэж байгаам. Ухаан нь "Эртийдээр Улмаа улаан гараараа галын оч үрээд л, ид шидийн, бас аймаар байсан" байх нь гээд төсөөлчихнө. 2009 оны саруудын эхний ням гарагуудыг дээрх өгүүлбэр болгоод кодлосон нь энэ. r-4,t-1,l-5,m-3,7-k,2-n тоонуудыг арын үсэгнүүдэд нь харгалзуулаад өмнө нь цээжилсэн байх хэрэгтэй, жишээ нь 4-г four гэж бичдэг, сүүлийн үсэг нь r.m үсэг доошоо 3, n үсэг 2 шүдтэй ч гэдийм уу.

Үүнээс I-р сарын эхний ням гараг 4нд, II-р сарынх 1нд гэвэл 12 сарынх: 4-1-1 + 5-3-7 + 5-2-6 + 4-1-6 байдлаар тайлагдана. 2009 оны 1 сарын 5 бол Даваа гараг, 2 сарын 8 бол Ням гараг гэдэг нь эндээс харагдаж байна уу?

2010: 3-7-7 + 4-2-6 + 4-1-5 + 3-7-5
2009: 4-1-1 + 5-3-7 + 5-2-6 + 4-1-6
2008: 6-3-2 + 6-4-1 + 6-3-7 + 5-2-7

Өмнөх жилийн Ням гарагуудыг олохдоо сар бүрийнх дээр 1-ийг нэм, ирэх жилийнхийг олохдоо харин 1-ийг хасаарай. Өндөр жилийн хувьд анхаарах жижиг зүйл бол бий, та бүхэн гярхай харвал анзаарна.

Манай ангийн хүүхэд энд тэнд санах ойн олимпиадад оролцоод шаггүй амжилттай яваа, дээр ирээд сонин ярихаар нь энэ талаар судлаж үзвэл их зүгээр юм байна гэж бодож байлаа. Хачир болгож ярихад саяын уншдаг ном их хуучин ном, Яманотэ шугам, Эбису экинээс жаахан яваад Good Day Books нэртэй англи хуучин номын дэлгүүр байна лэ, тэндээс авсийм. Номоо wishlist-д бүртгүүлчихээр, олоод мэйл биччих юм билээ. Токио дахь хамгийн том англи номын дэлгүүр гэсэн шүү ;)

Саруул, сэргэг санах ойн төлөө!

Итгэлийн хурд

2008-11-24T18:00:00.000+08:00

Aрлын Наран улсаас бичиж сууна. Ирэх болгондоо заавал очдог газар маань Шинжуку дэх Кинокүния номын их дэлгүүр. Түгдрэлгүй уншихаар төвшинд япон хэл маань одоохондоо хүрээгүй тул англи ном хэрэгцээндээ тааруулаад авна. Энд мэргэжлийн чиглэлийн ном үнэ өндөр байхад, текстбүүк, пэпербэк ер нь хямд талдаа. Сар хагасын өмнө

Design Patterns in Ruby
Founders at Work
The Speed of Trust

зэрэг номнууд авсны гурав дахийг нь өчигдөр уншиж дуусгалаа. Агуулга сайтай, сургамжтай, прагматик уг номыг Stephen M.R. Covey болон Rebecca R.Merill нар хамтран бичиж, 2006 онд олны хүртээл болгожээ. Тэмдэглэн авсан цөөн хэдэн өгүүлбэрүүд. . .

“Widespread distrust in a society . . . imposes a kind of tax on all forms of economic activity, a tax that high-trust societies do not have to pay.” – Francis Fukuyama

(Багцаалдан орчуулбал: “Өндөр-итгэлцэл бүхий нийгэмд төлөх шаардлагагүй таксыг итгэлцэл унасан газар эдийн засгийн бүхий л харилцаан дээрээ нэмж төлсөөр байдаг.” – Франсис Фукуяама)

“Үл итгэлцэл нь эдийн засгийн харилцаанд сөргөөр нөлөөлөөд зогсохгүй, хүн хоорондын харилцаа, хамтын ажиллагаа, шийдвэр, ер нь хүний амьдралын бүхий л орон зайд чөдөр тушаа болдог.“ – Стифэн М.Р. Кови

Британийн социологич Дэвид Хэлперний судалгаагаар нийт Америкчуудын 34% нь ямар нэгэн байдлаар бусдад тээнэгэлзэлгүй итгэж чадах бол энэ тоо латин америкт 23%, африкт 18%, түүнчлэн 4 үеийн өмнө энэ үзүүлэлт Их Британид 60% байснаа өдгөө 29% хүртлээ буурсан үзүүлэлттэй гарчээ. Сайн мэдээ нь Скандинавын орнуудад(Дани, Швед, Норвеги, Голланд) хамгийн өндөр буюу 68%-тай байгаа бол Мексик 1983 оны байдлаархи 19%-иас өдгөө 31%-д хүрсэн нь нийгмийн итгэлцүүрийг өсгөж болдгийг харуулж байна.

(Монгол минь хэдэн хувьтай бол? Өгсөж явна уу, уруудаж явна уу? Хүн бүрийн оролцоо юу байх вэ?)

Хурд болон өртөг нь итгэлцэл ямар байхаас шууд хамаараалтай хоёр хэмжигдхүүн. Итгэлцэл бага газарт хурд удаан, өртөг өндөр байдаг.

↓ Итгэлцэл = ↓ Хурд ↑ Өртөг

Харин итгэлцэл өндөр газарт хурд нэмэгдэн, өртөг буурдаг.

↑ Итгэлцэл = ↑ Хурд ↓ Өртөг

9/11-ний террорист халдлагын дараагаар америкийн агаарын тээврээр аялагчдын аюулгүй байдалдаа итгэх итгэл үлэмж хувиар уналаа. Онгоцонд алан хядлага үйлдэх заналхийлэл оршсоор байтал аюулгүйн баталгаа гаргах хяналтын систем зохих ёстой хэмжээнд хүчтэй байж, таслан зогсоож чадаагүйг тэр үед хүн бүр анзаарсан байх. 9/11-ээс өмнө онгоц хөөрөхөөс хагас цагийн өмнө ирээд, шалгалтаар төвөггүй түргэн нэвтэрдэг байтал уг хар өдрөөс хойш хяналтын түмэн процедур нэмэгдсэний дүнд нисэх нь үндсэндээ удаан, өндөр зардалтай тээвэр болон хувирлаа. Орон нутгийн нислэгийн хувьд онгоц хөөрөхөөс цаг хагасын өмнө, олон улсын нислэгийн хувьд 3 цагийн өмнө очиж байж онгоцонд суух жишээтэй . Нислэгийн билет бүрт аюулгүйн такс шингээстэй(нэмэгдэлтэй) боллоо. Хэдийгээр эдгээр хяналтын процедурууд маш чухал гэдгийг яриангүй хүлээн зөвшөөрч байгаа ч, өмнө ярьсан зүйлс: “Итгэлцэл унасан газар хурд багасч, өртөг өсдөг.” нь эндээс ил харагдаж байна.

(Хүн бүр, пүүс компани бүр хэрэглэсэн цахилгаанаа ном ёсоор нь төлдөг бол, хулгайн цахилгааны өртгийг төлдөг хэдэд нь хавтгайлан нялзаах шаардлага гарахгүйсэн, тэхээр 1кв цахилгааны үнэ хэд болж хямдрах бол? Хүн бүр хэрүүл уруулгүй билетээ аваад автобусаар зорчдог байсан бол, заавал кондуктор хүн ажиллах хэрэгтэй юу? Хэрвээ тийм бол тээврийн өртөг хэдүй хэмжээнд буух бол? Эд материалын болон итгэл найдварын хулгай дээрэм манай улсад ямар хэмжээний өртөг дагуулж байна вэ?)

- - - - - - - - -

Итгэлцэл нь ихэнхи хүний хувьд үл үзэгдэх хэмжигдхүүн. Бидний амьдрал, ажил үйлс, хамт олон, итгэл үнэмшилд хэрхэн нөлөөлдгийг тэр болгон анзаардаггүй. Уламжлалт бизнесийн томъёонд стратеги үржих нь гүйцэтгэл тэнцүү үр дүн:

S x E = R

(Strategy times Execution equals Results)

Үнэндээ энэ томъёонд үл харагдах хэмжигдхүүн-Итгэлцэл бүрэлдүүн болон орох ажээ. Энэ нь бага тохиолд такс болох тул үр дүн багасна, өндөр тохиолд үржвэр болох тул бодит үр дүн дээшлэнэ.

(S x E)T = R

([Strategy times Execution] multiplied by Trust equals Results)

Энгийн математик гаргалгаа:

(Хэдийгээр цээжээрээ сөрж, зам гарган хошуучлах нь асар их дарамттай ч, хүн шиг хүмүүс эрх мэдлийг зөв зүйтэй жолоодвол ард бид хэрхэн дэмжиж, уухай түрэн хүч нэмэх байсан бол? Үржвэр хэдэн хувьтай байх бол? Ммм..... маш буруу хандлага байна уу, хүрсний хойно дэмжинэ гэдэг?)

Without trust, there is no open society, because there are not enough police to patrol every opening in an open society. Without trust, there can also be no flat world, because it is trust that allows us to take down walls, remove barriers, and eliminate friction at borders. Trust is essential for a flat world. . . .

Thomas Friedman, Columnist, New York Times

(Маш сонирхолтой ном тул та бүхний таалалд лавтайяа нийцнэ гэж найдаж байна. Хэлсэн хийсэндээ эзэн нь болж явах ямар чухал үр дүн дагуулдгийг энэ номноос ойлгосон. Ингээд жижигхэн тэмдэглэлээ уг номын нэгэн ишлэлээр төгсгөе. Дараа боломж гарвал Фрэнсис Фукуяамагийн Trust - The Social Virtues and the Creation of Prosperity номыг уншиж, тэмдэглэл хөтлөнө өө, танд баярлалаа.)

<====

A great example of congruence is Mahatma Gandhi. At one point in his life, he was invited to speak before the House of Commons in England. Using, no notes, he spoke for two hours and brought an essentially hostile audience to a rousing standing ovation. Following his speech, some reporters approached his secretary, Mahadev Desai, incredulous that Gandhi could memorize his audience for such a long time with no notes, Desai responded:

“What Gandhi thinks, what he feels, what he says, and what he does are all the same. He does not need notes. . . . You and I, we think one thing, feel another, say third, and do a fourth, so we need notes and file to keep track.”

Gandhi was not only congruent within himself, he was also congruent with the principles he stood for. Not only did he have roots, he had a taproot that plunged deep into the reservoir of timeless principles that govern in life.

====>

Сорилын талаархи бага сага тэмдэглэл...

2008-05-27T17:29:00.000+08:00

Нэлээд дээхнэ сорилын талаар цөөн хэдэн ном уншиж байлаа, тэмдэглэн авсан зүйлсээс заримыг нь энд оруулав. Гоби, Очко нарын гигантууд энэ сэдвээр маш сайн нийтлэл бичиж байсныг уг постын төгсгөлд холбож өглөө.

Психилоги
Бид сорилын талаар ямар ойлголттой явдаг вэ? Ер нь хэрэгтэй юм уу? Програм хангамжийн сорил гэж ер нь юу юм бэ? Таны бодлоор доорхиос аль нь вэ?

Програмд ямар нэг алдаа байхгүйг харуулах ажиллагаа.
Сорилын зорилго нь програм хийх ёстой үйлдлээ хийж байгааг батлах явдал.
Тайвшрал, сэтгэл амарлихуйг тогтооход чиглэсэн үйл ажиллагаа.

Эсхүл гурвуулаа л зөв зүйтэй юу? Магадгүй тийм байх.

Харин J.Myer "The Art of Software Testing" номондоо "Сорих гэдэг нь аливаа алдаа сэвийг илрүүлэн гаргах, чанарыг тодорхойлох зорилгоор уг програмыг ажиллуулах үйлдэл юм." хэмээн бичжээ. Нөхөр энэ хандлагыг ихэд онцолсон байх бөгөөд ингэхээс ч аргагүй шиг байна. Учир нь хүний үйлдэл, түүний хүсэл зорилготой шууд холбоотой байх тул хэрэв хөгжүүлэгч програмын алдаагүйг батлах гэж байгаа бол аль болох л нормаль кэйсүүдийг сонгон авч сорилдоо ашиглах байх. Гэтэл мөрдөх ёстой хандлага нь үнэн хэрэгтээ эсрэг чигт байх аж...

- - - - - -

Сорилоор алдаа илрээгүй тохиолдолд бид "Сорил амжилттай боллоо!" хэмээн бахаддаг, харин олон илэрхэд"Амжилтгүй боллоо" гэж чимээгүйхэн шивнэдэг. Хандлагын зөрүү бас л гарч байна. Сорилоор алдааг илрүүлэхийг зорьдог тул, эхний тохиолдолд "Сорил амжилтгүй(эсхүл сэжигтэй)", удаахьд нь "Сорил амжилттай боллоо!" гэж үзэх хэрэгтэй юм байна.

Алдааг аль болох эрт илрүүлэх нь тустай. Учир нь хожуу илэрсэн алдааг засахад маш олон газар гар хүрэх, дахин ажил болох шаардлагатай болдог. Доорхи зургаас алдааны өртгийг хэзээ илэрч байгаагаар нь харьцуулан дүрсэлснийг сонирхоно уу.

Эх сурвалж: Ron Patton - Software Testing, 2005 Sams Publishing

Барын зулзагыг бага дээр нь гэж ярьдаг да, бид. Ингэхлээр тестерийн үүрэг бол програмыг бийлд хийсний дараагаар алдааг хайх бус, төслийн шаардлага тодорхойлолтын үеэс л эхэлж, аль болох бага дээр нь олж ангуучлах явдал байх нь. Тэгэхээр соригчийг дизайны төвшинд шийдвэр гаргалцдаг лут товарищ гэж ойлгож болох нь.

Сорилд баримтлах 11 мөрдлөгөө
J.Myer-ийн анхлан гаргасан(1979 он) мөрдлөгөө одоо ч хэрэглэгдсээр. Зарим нь ойлгомжтой л байх, зарим нь ч сонин л юм:

Cорилд баримтлах 11 мөрдлөгөө

Сорил гэдэг нь тодорхой нөхцлүүдийг ашиглан тухайн програмын бүрэлдэхүүний алдаа сэвийг илрүүлэн гаргах, чанарыг тодорхойлох зорилт бүхий процесс юм.
Сорил нь нэгэнт алдааг илрүүлэн гаргах зорилготой байдаг юм бол, сайн сорилын нөхцөл нь алдааг илрүүлэн нээх өндөр магадлалыг өөртөө агуулж байх ёстой.
Соригч нь сорилын үр дүнг сайтар нягталж, баталгаажуулах хэрэгтэй.
Сорилын нөхцөлд хүлээгдсэн үр дүн буюу гаралт нь заавал тусгагдсан байх ёстой.
Сорилын нөхцөлд зөвшөөрөх болон үл зөвшөөрөх оролтын өгөгдөл, түүний хүрээг тодорхойлсон байх хэрэгтэй.
Байх магадлалтай алдааны тоо нь одоогоор илрээд байгаа алдааны тоотой шууд пропорциональ хамааралтай байдаг.
Хөгжүүлэлтийн багаас өөр баг сорилыг гүйцэтгэвэл зохимжтой.
Сорил нь давтагдах, дахин хэрэглэгдэх боломжтой байх ёстой.
Сорил нь төлөвлөгдсөн байх хэрэгтэй.
Сорилын үйл ажиллагаа нь төслийн хөтөлбөрт тусгагдсан байх ёстой.
Сорил нь мэдлэг, сэтгэлгээ шаардах нарийн ухаан.

6-р мөрдлөгөө нь их сонирхолтой. Ухаан нь, эхний сорилоор А модулиас 20, Б модулиас 3 алдаа илрүүлжээ гэж саная. Алдааг засаад дахиад сориход аанай л А модулийн алдааны тоо жин дарах магадлал өндөр аж. Зургаар дүрсэлбэл:

Эх сурвалж: Glenford J. Myers - The Art of Software Testing, John Wiley & Sons, Inc.

Сорилын болцын загвар
TMM буюу Сорилын болцын загвар(Testing maturity model) нь өндөр чанартай бүтээгдэхүүнийг тогтоогдсон төсөв зардлаар, товлосон хугацаанд чадварлаг соригчдын бүрэлдэхүүнээр, оновчтой төлөвлөгөөний дагуу сорих зорилго бүхий фрэймворк юм. TMM нь CMM буюу Capability Maturity Model-д тулгуурлан боловсруулагдсан ба эдгээр моделиуд нь хэдүйн дэлхийн даяар нэвтэрч, өдгөө олон пүүс компаниуд даган мөрдөж байна. TMM нь CMM-ийн адилаар таван шаттай:

Эх сурвалж: Ilene Burnstein - Practical Software Testing, Springer

Төвшин 1 – Эхлэл
Програм хангамжийн тодорхойлолтын ямар нэгэн бичиг баримт байхгүй. Сорилын үйл ажиллагаа нь зүгшрүүлэлтээс(debugging) ялгагдах зүйлгүй бөгөөд, програмыг зөв ажиллаж байгааг батлахын тулд хийгддэг. Програмын рилийз нь ямар нэгэн чанарын баталгааг хангаж чаддаггүй. Нөөц, багаж хэрэгсэл, мэргэшсэн боловсон хүчний дутагдалтай. Ийм компани нь CMM-ийн 1-р төвшинд хамаарна.

Төвшин 2 – Фаз тодорхойлолт
Сорил нь зүгшрүүлэлтээс тусгаарлагдах боловч, кодчилолын дараа хэрэгжих процесс байдлаар тодорхойлогдоно. Кодоос шууд хамааралтай учир зөвхөн дууссаны дараа нь гүйцэтгэгддэг. Сорил хийх зорилго нь бүтээгдэхүүн нь тодорхойлолтын бичиг баримттай тулж байгааг батлах явдал. Хар болон шилэн хайрцаг гэх мэт сорилын үндсэн хэлбэрүүд хэрэгжинэ. Сорилын шатууд нь нэгжийн, нэгдсэн, систем, суурилуулалт зэргээр хуваагдана. Сорил нь хөгжүүлэлтийн хожуу шатанд төлөвлөгддөг учир чанар тойрсон асуудал их гардаг. Шүүмж, болон хэлэлцүүлэг хийгддэггүй. Гараар ажиллуулах, турших нь сорилын үндсэн хэлбэр болно.

Төвшин 3 – Нэгдэл(Integration)
Сорилыг кодчилолын дараа бус шаардлага-тодорхойлолтын фазаас эхлэн төлөвлөнө. Бүтээгдэхүүний шаардлагад үндэслэн сорилын зорилтууд тодорхойлогдоно. Сорилын багийг томилохын зэрэгцээ, сорил нь хөгжүүлэлтийн процессын нэгэн чухал хэсэг байдлаар хүлээн зөвшөөрөгдөнө. Сорил нь төлөвлөсөн хугацаа, төсвийн дагуу хэрэгжиж буй эсэх нь байгууллагын хэмжээнд харагдах боломжтой байдаг. Сорилын ерөнхий багаж хэрэгслүүд ашиглагдана. Шүүмж хэлэлцүүлгүүд явагдах боловч, энэ нь албан ёсны процесс болтлоо тодорхойлогдон мөрдөгддөггүй.

Төвшин 4 – Удирдлага болон Хэмжилт
Сорил нь хэмжигдэх боломжтой процесс болно. Хөгжүүлэлтийн бүх шатанд шүүмж хэлэлцүүлгүүд сорилын нэг хэлбэр байдлаар тусгагдан хэрэгжинэ. Програм нь найдвартай байдал, хэрэглэгдэх чадамж, өөрчлөгдөх боломж зэргээр төрөл бүрийн чанарын үзүүлэлтээр соригдоно. Бүх төслийн хэмжээнд сорилын нөхцлүүдийг дахин ашиглах, давтах зорилгоор тусгай санд хадгална.

Төвшин 5 – Хөгжил/Алдаанаас сэргийлэх/Чанарын удирдлага
Сорилын процесс нь нэгэнт удирдагдах, хянагдах, хэмжигдэх боломжтой болсон байна. Сорилын болцын өөрчлөлт, хөгжил дэвшил тасралтгүй явагдана. Алдаанаас сэргийлэх, чанарыг удирдах процесс нэгэнт биеллээ олсон байна. Автоматаар сорилыг гүйцэтгэх, давтах боломжтой. Мөн сорилын нөхцлийг зохиох, өөрчлөх, алдааны мэдээлэл цуглуулах зэрэг ажлуудыг багажийн тусламжтайгаар хялбархан хийж гүйцэтгэнэ. Сорилын хэмжилт болон чанартай холбоотой мэдээллийг мөн автоматаар гарган авах боломжтой.

Нэмэлт:
Сорилын талаархи нэн сонирхолтой нийтлэлүүд:

The Joel Test

2008-04-20T17:29:00.000+08:00

Компанийн болц, царааг хэмжих CMMI нэртэй модель байдаг. Нийт таван төвшинтэй ба эдгээр бүрт хатуу заасан босго, хэмжигдхүүнтэй. Судлая гэвэл нь нуршуу ном нэлээд хэдийг унших хэрэгтэй болно, үүний оронд J.Spolsky-ийн "The Joel Test"-ийг сонирхвол нь, ямарав? Орчуулан хүргэхийг зорьлоо ;)

SEMA гэж сонсож байсан уу? Софтвэрийн багийг хэр сайн бэ гэдгийг хэмжих нэг төрлийн систем юм л да. Жаахан азна анд минь, юу юугүй гүүглэдэж, үүний талаар судлах гээд хэрэггүй. Учир нь SEMA-г ойлгоход лавтай 6 жил зарцуулна. Үүний оронд миний зохиосон гайгүй далий тестийг сонирхвол... Гурван минут л хангалттай.

The Joel Test

Та соорс контроль ашигладаг уу?
Нэг алхмаар та бийлд хийж чаддаг уу?
Танайх өдөр бүр бийлд хийдэг үү?
Танайх алдаа бүртгэлийн баазтай юу?
Алдаагаа засаж байж шинээр код бичдэг эсэх?
Төслийн төлөвлөлт(schedule) тань яв тав шинэчилэгдэж байдаг уу?
Танд спек байна уу?
Програмчид тань нам чимээгүй орчинд ажилладаг уу?
Боломжит бүх багаж хэрэгслийг та ер нь ашигладаг уу?
Танайд тестерүүд бий юу?
Ажил горилогчоор код бичүүлж шалгалт авдаг эсэх?
Програмын ашигт үйлийн тест хийдэг үү?

Энэ сорилд тийм/үгүй гэсэн хариулт л хангалттай, дажгүй байгааз? Өдөрт хичнээн мөр код бичигдэв, нэг фаазад хэдэн алдаа бүртгэгдэв энэ тэр бузгай том тооцоо огтоос хэрэггүй. Ердөө л "Тийм" бүрт 1 оноо өг, тэгээд л гүйцээ.

12 оноо авсан бол төгс, 11 бол боломжийн, харин доошоогоо гэцүү. Үнэндээ, ихэнхи компаниуд 2, 3-ын төвшинд л туудаг, тиймдээ ч асуудал ихтэй байхад Microsoft мэт нь үргэлж 12-той намбалзаж байх жишээтэй.

Мэдээжээр, дээрх шалгуураар амжилт/уналтыг яв цав тодорхойлно гэж байхгүй. Хэрэв танд сайн баг байлаа гээд, хэнд ч хэрэггүй програм бичиж байгаа бол, гарсан бүтээлийг тань хэрэглэгчид худалдаж авах нь юу л бол. Нөгөөтэйгүүр эдгээрээс нэгийг ч хэрэгжүүлдэггүй боловч захын бачканууд дэлхийг донсолгосон мундаг програм бичээд тавьчихыг үгүй гэх газаргүй. Ер нь энэ бүхний голч, эдгээр 12 шалгуурыг зөв зохистой ашиглавал, танайх санасандаа сарвайдаг, сарвайснаа авдаг мундаг баг болно.

Орчуулга хийгдэж байна....
Үргэлжлүүлэн орчуулахгүй ч байж магад. Хүргэх хамгийн гол санаа дээрх саарал цонхонд байна л да, уул нь. Энэ тест бүхлээрээ J.Spolsky-ийн "Smart and Gets Things Done" нэртэй номонд бий. Ном нь сонирхолтой, мундаг егөөтэй. PDF хувилбарыг нь эндээс татаад уншиж болох байх.

Rails-ийг Oracle-тай холбох нь

2008-04-15T19:21:00.000+08:00

Нэлээдгүй өндөр ачаалалд, яг таг ажиллах ёстой веб програм хийх хэрэгцээ гарсан тул богино хугацаанд, чанартайхан бүтээл гаргаж болохоор хөгжүүлэлтийн хөрс сонгох хэрэгтэй боллоо. RoR-ийн талаар өмнө сонирхож, номны ганц хоёр хуудас эргүүлснээс бус амьдралд хэрэглэгдсэн бодьтой зүйл хийж байсангүй. Ямартай ч мундаг динамик боломжтой Ruby хэлээр, convention over configuration паттерныг барьж хийсэн, сүүлийн үед хүчээ авч яваа хөгжүүлэлтийн суурь юмаа гэдгийг гадарлаж байгаам.

Үүссэн Rails програмыг Oracle баазтай холбох гээд хагас өдөр зарцуулчихсан тул эндээс мэдсэн зүйлээ хэрэгтэй хүнд нь хөтөч болгон бичиж үлдээх нь зүйтэй гэж үзлээ. Таныг аль хэдүйн баазаа тохируулж, rails програмынхаа скелетоныг үүсгэсэн гэж бодож байна. Бидний тохиолдолд баазыг өөр машинд суулгасан. Алдарт scott/tiger-ийн баазыг жишээгээр авлаа.

Шаардлагатай багцууд:

ruby-oci8, Oracle баазтай холбогдох ruby интерфэйс
activerecord-oracle-adapter
Oracle instant client

Багцуудыг суулгах нь:

ruby-oci8
Виндовз хэрэглэгчид ruby-oci8-1.0.0-mswin32.rb файлыг татаж аваарай. Доорхи байдлаар хялбархан сууж байна:

C:\>ruby ruby-oci8-1.0.0-mswin32.rb
Copy OCI8.rb to c:/ruby/lib/ruby/site_ruby/1.8/DBD/OCI8
Copy oci8.rb to c:/ruby/lib/ruby/site_ruby/1.8
Copy oci8lib.so to c:/ruby/lib/ruby/site_ruby/1.8/i386-msvcrt
OK?
Enter Yes/No: yes
Copying OCI8.rb to c:/ruby/lib/ruby/site_ruby/1.8/DBD/OCI8 ... done
Copying oci8.rb to c:/ruby/lib/ruby/site_ruby/1.8 ... done
Copying oci8lib.so to c:/ruby/lib/ruby/site_ruby/1.8/i386-msvcrt ... done
OK
C:\>

activerecord-oracle-adapter
Oracle адаптерийг gem ашиглан суулгах нь хялбар аж:

C:\>gem install activerecord-oracle-adapter --source http://gems.rubyonrails.org
Bulk updating Gem source index for: http://gems.rubyonrails.org/
Bulk updating Gem source index for: http://gems.rubyonrails.org/
Successfully installed activerecord-oracle-adapter-1.0.0.9216
1 gem installed
C:\>

Oracle instant client
Татсан програмаа хаа нэг эвтэйхэн газар задлаж орхи. Эндээс oci.dll, oraociei11.dll файлуудыг хайж олоод Windows\System хавтаст хуулна. Хамаг цагаа үүнийг мэдээгүйгээс барсан байгаам. За тэр болоод өнгөрч, одоо Ruby интерфэйс бэлэн болсон байх учиртай, шалгаж үзье:

C:\>ruby -r oci8 -e "OCI8.new('scott', 'tiger','//<db-host-address>:1521/<sid>').exec('select * from emp') do |r| puts r.join(','); end"

7369,SMITH,CLERK,7902,1980/12/17 00:00:00,800.0,,20
7499,ALLEN,SALESMAN,7698,1981/02/20 00:00:00,1600.0,300.0,30
7521,WARD,SALESMAN,7698,1981/02/22 00:00:00,1250.0,500.0,30
7566,JONES,MANAGER,7839,1981/04/02 00:00:00,2975.0,,20
7654,MARTIN,SALESMAN,7698,1981/09/28 00:00:00,1250.0,1400.0,30
C:\>
Yes!!!, хэвийн ажиллаж байна.

database.yml
Oracleтай холбогдох интерфэйсүүд бэлэн болсон тул, одоо веб програмынхаа баазын тохиргоог хийе. Дараахи байдлаар хийхэд хангалттай:
config/database.yml

# Oracleтай холбох нь.
development:
    adapter: oracle
    database: <db-host-address>/<sid>
    username: scott
    password: tiger

Одоо веб програмаа эхлүүлээд, браузерт нээвэл дараахи мэдээлэл гарч байх учиртай:

Бүх зүйл хэвийн, иймд emp нэртэй баазын модель үүсгэе:

ruby script\generate model emp

Rails баазад маань emps нэртэй хүснэгт байгаа гэж автоматаар ойлгоно. Гэтэл scott-ийн баазад emp нэртэй л хүснэгт байгаа шүү дэ? emp моделийг emps бус emp хүснэгттэй яаж уях вэ? Дараахи байдлаар хүснэгийн нэрийг дахин тодорхойлж болно:
app/model/emp.rb

class Emp < ActiveRecord::Base
    set_table_name "scott.emp"
end

Үүний дараагаар index хуудас(action) үзүүлэх scott нэртэй контроллёр үүсгэе:

ruby script\generate controller scott index

index хуудсанд emp хүснэгтийн мэдээллийг харуулъя. Ингэхийн тулд scott_controller-ийг дараахи байдлаар бичээд үз:
app/controllers/scott_controller.rb

class ScottController < ApplicationController
    def index
        @emps = Emp.find(:all)
    end
end

Одоо presentation layer буюу татсан мэдээллээ дэлгэцэнд байршуулах index файлыг боловсруулъя:
app/views/scott/index.rhtml

<h3>Ажилчид</h3>
<table border="1">
  <tr>
    <%names = Array.new;
      Emp.column_names.each{ |name| names << name;
    %>
      <%="<th>#{name}</th>"%>
    <%}%>
  </tr>
  <%for emp in @emps%>
  <tr>
    <%for name in names%>
      <td><%=eval("emp.#{name}")%> </td>
    <%end%>
  </tr>
  <%end%>
</table>

Одоо хийсэн ажлаа шалгая. Броузерт: http://127.0.0.1:3000/scott гэж бичээд үзнэ үү. Доорхитой ижил үр дүн гарч байна уу?

За ингээд бид зорьсондоо хүрлээ. Доорхи линкүүд танд хэрэг болж юу магад вэ, гүйлгээд харна биз:

Нэмэлт:
config/environment.rb файлд

ENV['NLS_LANG']='american_america.AL32UTF8'

мөрийг нэмж өгөөрэй. Одоо Oracle-аас монгол(UTF-8) текстүүд асуудалгүй татагдах болно.